Make your own free website on Tripod.com

青蛙雙週記是青蛙仔在澳洲一份每兩星期出版一次的報章--澳洲訊報的一個專欄,為了讓澳洲地區以外的朋友可以看到青蛙雙週記, 現特此將該專欄已出版的文章再一次放在此, 讓大家可以知道青蛙仔在青蛙日記以外, 究竟還可以有什麼寫出來呢? 答案可在此中尋!
 
 
 

請給我電郵告訴我您的意見

13.12.2002 No.142

23.11.2002 (Sat) 晴
晚上睇吾係獎門人, 又睇到個【唐三藏】的唔掂檔之處, 在【落大閘】的環節, 搖頭康俾提示佢, 估完了個詞語係【仙遊】, 佢竟然話係咩來, 跟住倒轉頭佢俾提示, 見到【暗渡陳倉】呢句野, 明顯佢根本唔知係乜, 即時叫飛, 如果佢識講【明修棧道】, 對方應該會識得答掛, 真係抵佢俾人射水!

生果報的頭條話有人在提款櫃員機度唔記得拎走張咭, 跟住傑後面的人就乘機試探張咭, 竟然撞中了密碼係123456, 跟住呢個人都幾叻, 走 去用機買了百幾張八達通咭來套現, 不過輾轉之下都係被發現仲拉埋, 警方祗係憑櫃員機的閉路電視認到個樣就可以咁容易拉人, 真係幾好 野, 其實青蛙仔今日係想講下, 個鬼佬咭主又真係太貪方便, 係人都知提款咭就唔應該用呢種咁易記, 甚至係生日日期來做密碼啦, 而家攪 成咁, 自己都應該負點責任, 青蛙仔張提款咭都好多年, 個號碼都無乜點轉, 要撞彩撞中就真係唔易, 不過自己就無成日轉密碼的習慣, 而 公司進入電腦系統就一定隔幾個月逼你轉一次密碼, 所以青蛙仔心目中就有兩組密碼輪流用, 絕對唔會好似好多人咁, 打來打去都話密碼不 符, 除此之外, 在網上好多account都係用呢兩組密碼, 其實青蛙仔覺得真係無乜大不了, 所以唔會成日換, 甚至都有幾個熟人會知道呢組密 碼, 因為覺得就算俾人知又如何丫, 又唔做得出乜, 總好過成日換來換去, 攪到自己都唔記得用咩密碼, 入都入唔返!

24.11.2002 (Sun) 晴
今日腦裡面成日有首歌轉轉下, 算係近期好喜歡的一首歌, 好喜歡幾句歌詞, 如果有朋友可以對到號入到座的話, 青蛙仔好想跟你說一聲多謝你, 送俾大家容祖兒的半首特別嘉賓!

唯獨你當我最快樂時替我高興
當我要放任時賜我反應
有你陪伴氣氛總有保證
娛樂我是你本領
唯獨你當我最快樂時替我高興
如像將恭喜變作鈴聲
不算天大事情
難道你忍心不去贈興
(仍期待你贈我掌聲)

25.11.2002 (Mon) 晴,清涼
樂壇新人【周身痕】最近同帶佢出道的阿叔鬧翻了,因財失義而反目真係屢見不鮮,呢位【生叔】都算係樂壇前輩,當初用盡方法推介個侄出來,估唔到未夠兩年,錢又未賺到就已經因為錢銀而解除經理人合約,青蛙仔唔知內情,照表面睇就梗係覺得個後生反骨啦,當初你情我 願的簽約,就算人地真係食水深,當你係搖錢樹,都無計架,唔係咁樣人地點解咁落力捧你先,而家搵唔到錢就話要解約,有無諗過係咪自 己唔掂檔先?娛樂圈真係好多呢類事發生,未紅就心甘命抵去簽不平等條約,紅左就覺得俾人食一大截好唔抵,打官司都要打甩張約,青蛙仔覺得呢種都算係反骨兼唔夠道義,但當然都會有唔少人係飲水思源的, 好似【天濛光】咁, 雖然青蛙仔唔係咁喜歡佢, 但佢對帶佢出道的歌唱老師都算唔錯, 絕無好似【東東】咁因財佢反曬面, 其實以 【天濛光】初出道時的歌藝, 根本好難搵人同佢唔唱片, 相佢歌唱老師為佢出左唔少力, 所以【天濛光】一直都銘記於心, 到而家都仲對佢歌唱老師好好!

26.11.2002 (Tue) 晴,清涼乾燥
【影帝偉仔】終於再入錄音室錄唱片,今次淨係睇同佢合作的幕前幕後卡士都極有睇頭,雖然佢唱功係麻麻,但佢唱某些歌又幾有味道,而且佢又唔係成日出碟,青蛙仔覺得都幾有收藏價值,可能都會買來擺下,不過用咁短時間製作趕聖誕出街,會唔會急左D呢?

29.11.2002 (Fri) 晴,出糧日
點解娛樂圈的藝人總係會同人講,成名係要付出代價,無曬自由,連去街邊篤魚蛋都唔得,最近用日本名的人氣女歌手就專登去篤魚蛋俾記者影相,青蛙仔就想問,到底係唔係個個都咁鍾意去街邊篤魚蛋先,講真青蛙仔就唔係咁鍾意,所以亦唔覺得個女歌手食唔到魚蛋會有幾痛 苦;好似早年的移民潮,好多移民外國的香港人,又怕死又口口聲聲話掛住香港,又話外國太靜,夜晚想話食碗雲吞麵都唔得,青蛙仔就會 問佢地:【你響香港會成日食雲吞麵咩?青蛙仔就唔會話肚餓就食雲吞麵喎!】,以上兩件事都係屬於曬命一族,正所謂【食得咸魚抵得 渴】,篤魚蛋同食雲吞麵呢兩樣野,會唔會小兒科左D呀?

01.12.2002 (Sun) 晴
尋日的大新聞當然係有殺手出現香港啦, 估唔到而家香港咁唔安全, 眾目睽睽之下都可以好似做戲咁殺人, 報紙形容殺手唔係好似劉華的全職殺手的造型, 祗係普普通通的打扮, 其實青蛙仔覺得咁先係真正殺手, 如果下下都黑皮褸, 著到型一型咁, 真係係人都留意到啦, 點會咁 容易埋到人身後殺人喎, 呢件案雖然轟動, 不過事不關己, 青蛙仔都係係咁意睇下就算, 不過就覺得呢之果間老牌茶樓都算大鑊, 因為一旦 有事發生, 生意唔多唔少都受影響, 其實青蛙仔祗係去過呢間茶樓一次, 覺得班伙記真係好睇人去招呼, 達官貴人熟客就當然招呼得好, 如 果唔係熟客, 無端端walk in入去就未必受到禮待, 青蛙仔好耐以前的一位女同事的丈夫就係在呢間茶樓工作, 口氣之大令人討厭, 所以青蛙 仔一向都唔太喜歡呢間野, 今次有事真係哈哈哈!

03.12.2002 (Tue) 晴,和暖
下午見到有個後生仔在青蛙仔櫃檯前,似乎係買了盒電腦遊戲,個包裝都幾靚幾大盒,佢都幾心急打開包裝,青蛙仔祗見又外盒又內盒鬼咁多野,但其實裡面祗係一隻無膠盒的光碟、幾張彩圖同埋說明書之類,個男仔將呢幾樣野拎出來睇一次,跟住就放入個背囊,個紙盒同一切 包裝就義無反顧的全數丟入垃圾桶,真係好灑脫,青蛙仔真係好驚訝佢會咁做, 其實個盒都有好多野睇, 而且青蛙仔又諗, 如果隻碟係壞的 又點算?青蛙仔真係做唔到咁,好多時買野都驚會壞,又驚唔識用, 留番個包裝同說明書至地老天荒都唔捨得丟棄,今日見到呢個後生仔的行為都幾令青蛙仔感觸,因為呢一代的後生多數都係快去快來、貪新忘舊、甚至都幾無情,點會咁易有留戀同珍惜,一下子所有野棄掉,要回頭已是太難了, 要重拾舊歡又可以往哪裡尋?!

29.11.2002 No.141

08.11.2002 (Fri) 陽光燦爛的秋日
原來有咁多朋友唔滿意做傳銷的人,講起就好似敵愾同仇咁,不過青蛙仔就唔係太同意傳銷同保險歸入同一類,因為始終保險都會係幫人,仲可以有儲蓄成份同埋有所保障,係睇下個經紀俾個咩計劃同埋有無經驗幫你,最後點都會有喳拿,不過青蛙仔真係勸年輕人要諗過先好入保險或傳銷行列,唔係話睇到人地好掂自己就會掂,要諗下自己識幾多人,而呢班人又有無意欲要買保險同你的產品甚至做你下線,仲要諗埋一公開左自己做保險同傳銷就會有起碼八成朋友唔見左,呢個代價都幾大,如果佢地真係雄心萬丈,唔到黃河唔心息,係都要一試的話,都好難阻止,唯有祝福佢地,但就會同佢地表明立場,咪使旨意青蛙仔會做你下線,保險亦唔會再買,但朋友可以照做,睇你自己想唔想啦!

11.11.2002 (Mon) 晴朗
今朝有個女人來青蛙仔個窗口問野:【我有個細路仔佢點點點點點】,於是青蛙仔就好有耐性答佢,講完之後青蛙仔多口加多一句細路仔唔同大人,個女人即時話有:【唔同咩,咁佢十八歲喎!】,青蛙仔俾佢激到笑,證明一般父母眼中係唔會覺得仔女會長大,永遠都會當佢地 係細路仔,到底係唔想佢地飛走定係想成世都呵護住佢呢?

最近老麥的雞塊套餐加多了幾件,仍然照售舊價,附送醬汁就俾多一盒,如果再額外要多盒的話就要收一蚊一盒,竟然都一樣有多事之徒唔 滿意,又話老麥濫收費,青蛙仔覺得九件雞塊點兩盒醬就非常夠用,再拎多一盒的人先係濫用,唔收錢佢地係唔會珍惜,好似人地外國超市 連膠袋都計錢,咁樣大家就會珍惜,因為用自己錢買,就唔會係唔係都要多幾個膠袋了,其實香港的惠康都有唔要膠袋回贈錢,即係你買滿 一個數目而又唔要膠袋就會收少你兩毫,呢樣野根本好少人留意,亦唔會咁蠢唔要膠袋,青蛙仔有時都會咁做,但偏偏連個收銀員都唔知, 又要confirm一輪先俾番兩毫,好似俾乞兒咁,所以而家都費事話唔要膠袋,帶番去當垃圾袋算了!

15.11.2002 (Fri) 晴
蔡姓前輩歌手在內地撞車嚴重受傷,唱片公司【湊巧地】推出佢以往的精選碟,又話本來預備了整個配套俾佢復出,又舊歌翻唱又演唱會,都唔知真定假,但而家個人傷得咁重,真係講乜都無用,雖然佢唔係青蛙仔的偶像,但佢確實好有才華,唱作唔少經典歌、甚至廣告歌,而 且默默耕耘,有時聽到首好歌,睇一睇原來係佢作的,都幾佩服,今朝睇完報導佢的新聞之後,成朝都隨口唱住佢一首舊歌,當年都算做非 常流行,不過今日唱來總有點大吉利是的感覺,盡量都抑制住自己唔好唱,希望唔好【再見也許不再會】啦!

17.11.2002 (Sun) 陰涼
今日好放肆地訓到十一點先起身, 因為知道今日都係休息日, 都無咩特別地方去, 本來八九點醒左一次, 都繼續再訓夠先起身, 跟住就食早餐睇報紙, 其實尋晚都在網上睇到金馬獎的結果, 今日就再睇報紙的詳細報導, 今年似乎係港片天下, 黎明及李心潔封影帝影后, 真係唔知 好定唔好, 因為青蛙仔覺得三更裡面的黎明及不上多年前的甜蜜蜜, 而李心潔在見鬼的表現亦祗係一般, 不過青蛙仔見到報導話鄭天后在第 一回合已出局, 又真係覺得合理, 佢主演套所謂愛情鬼片, 演譯方式完全唔討好青蛙仔, 失敗係極之合理, 其餘都無咩想講了!

19.11.2002 (Tue) 陰涼,三色台慶
今日係三色台台慶,青蛙仔家人與此電視台有淵源,因此都係睇呢個台多,不過近幾年的台慶節目真係無以前咁吸引,十幾廿年前有楊盼盼助陣,聯同其他藝員大玩馬戲班高難度動作,真係幾好睇,一到台慶夜就少好多人去街,連市道都差D;

到左今時今日已經無觀眾覺得台慶有睇頭,但青蛙仔仍然覺得呢個台的製作水準係好高,班幕後職員應該佔好大功勞,幾十人一齊開場做 live show,要控制真係唔易,總係令人覺得呢個台的人力物力好勁,雖然近年已經唔會有任何項目令人有驚喜,但青蛙仔仍然覺得幾年前 【阿姐】同二三十個新冒起的小生大跳【熱咖啡】係非常精彩,當年佢癌病初愈,做了【玉女掌門】的演唱會嘉賓,人氣即時反彈,短期內 出兩隻碟、開兩次演唱會,並在台慶夜以當時的最佳狀態表演,可能有人會覺得佢幾十歲人仲賣風騷係好難接受,但試問又有邊個可以咁壓 得住場,你又賣來睇睇丫!

呢個項目最錦上添花之處係阿姐表演完之後,家英哥拿拿臨走出去幫阿姐披番件外套,呢種不亢不卑的攝位搶鏡真係無得頂,佢一出來仲有 邊個會記得阿【古仔】都係其中一位表演者先,呢種功力係要浸的!

臨放工前有個女人陪個十七歲仔來補領證, 佢俾錢青蛙仔時埋怨個仔無用, 玩唔見個證, 於是青蛙仔就打圓場話佢個仔有用, 同國父同一日 生日, 點知個衰仔反問青蛙仔國父係邊個, 青蛙仔忍唔住問佢有無讀書, 佢仲好得戚咁答話讀中三, 真係令青蛙仔搖頭歎息, 連佢阿媽都唔 好意思, 話佢唔知讀咩書, 青蛙仔就同佢講呢次真係幫你唔到了, 唉, 後生!!

21.11.2002 (Thu) 晴
放工返到屋企, 剛好趕及睇到沙麗另一首新歌的MTV, 呢首【華麗緣】真係好正, 同【傷逝】一樣咁好聽, 而且又係拍得佢好靚, 一個過了四十歲的女人仲可以保持得咁好, 有女人味得來亦無【祕密鎖匙II】的兩個代言人咁人工化, 香港實在應該俾多點空間呢類有實力的歌手呢!

晚上睇【孫悟空】, 發覺個【唐三藏】真係好唔掂檔, 青蛙仔唔係好憎佢, 但青蛙仔一直都唔覺得佢有咩本事可以做到歌星, 因為佢無一首歌合青蛙仔耳緣, 人又唔夠好樣, 而且仲覺得佢唔係好夠內涵, 今晚又一次見證了, 聽見佢講出【海市蜃樓】個【蜃】字, 竟然讀咀唇個【唇】字, 真係有點失望, 唔通佢從來都無聽過阿LAM唱呢首歌? 繼而再講【阿彌陀佛】, 又將個【彌】字讀做【離】, 雖然呢套劇根本就係玩玩下, 但係會有好多小朋友睇, 真係誤人子弟得緊要!

兩份大報的報頭條報導,又有影藝人涉嫌車禍頂包兼體內酒精超標而被捕,不過今次係圈中出名好身材的靚女,唔知大家對佢會唔會好似對 【阿四個仔】咁,想鋤死佢呢?相信好多人都會憐香惜玉,想呵住佢來講:【算啦,下次唔好了!】,對【阿四個仔】就會話【抵你死啦, 通櫃啦!】,哈,男女真係平等?

15.11.2002 No.140

23.10.2002 (Wed) 陰雨,涼
睇娛樂版知道沙麗的新歌原來雄踞各大流行榜的冠軍位置,估唔到前輩歌手仲可以有此成績,唱片公司都應該落唔少【心機】,首歌確實係好,而且好難唱,靚妹仔在K度未必唱得到,不過就算唱唔到都可以用心欣賞一下,老餅唱的歌都可以好吸引及受尊重,報紙仲話首歌仲好有 機會成為song of the year添,當唱片公司各出奇謀大鬥法之時,有首咁鎮得住場的歌彈出來,大家都會心服口服唔使爭啦,金曲金獎由一 位咁夠份量的前輩獲得,好過求其俾個偶像歌手拎啦!

25.10.2002 (Fri) 晴
放工之後去CD店, 祗見人頭湧湧, 真係用水洩不通來形容, 青蛙仔背住個背囊, 幾經辛苦先逼得入去, 根本唔需要睇其他野, 真接就入去收銀處諗住買容祖兒的新精選碟, 點知原來前面有五六個人在排隊俾錢, 真係誇張, 個個都係買佢隻精選碟, 青蛙仔望見收銀處存放CD個架得番幾隻, 而家前面一個學生直頭就拎住DISPLAY個隻來俾錢, 計一計數之下, 唔係咁邪掛, 輪到自己剛好賣曬喎, 但都排緊隊, 無理由唔睇真d, 好彩, 原來仲有大把存貨, 祗係未及包裝, 未放得切上架, 真係好耐無領略過去搶貨的時候了, 唔係同佢賣廣告, 事實真係抵得好緊要, 相信元朗真係全城最平, 祗係賣$82, 十幾首歌, 首首都有番咁上下好聽, 而且個包裝真係精美得緊要, 打開裡面見到成本相簿咁, 設計上真係花唔少心機來打擊盜版, 呢幾十蚊真係好值得去支持呢班音樂人, 如果要揀Album Of The Year, 青蛙仔一定會投呢隻碟一票!

26.10.2002 (Sat) 晴
尋晚有朋友問青蛙仔關於領成人身份證的情形,提及要收幾多錢,其實都有唔少人以為做身份證一定要錢,成日走來青蛙仔個櫃檯問價,青蛙仔就答其實政府唔係咁括龍,基本上兒童證、成人證同埋第一次申請都應該唔使錢,而因為遺失、損毀或者更改而再造張證先要收$395,而有部份人俾錢時都會好似死老豆咁,有D人仲會鬧政府搵笨收得貴,青蛙仔就會安撫佢地話其實收平左,因為成本唔止咁少,所以整一張蝕一張,有D就走得順氣,有D就會鬧埋董伯伯,遇到呢D人就一定要閉咀,唔好再同佢傾,因為呢D人經已short上腦,同佢講野就棧佢收唔到制,不理為妙。

既然講開身份證,以下呢樣就真係好多人都唔知道,當拎住份表格睇到國籍一欄,唔知大家會填咩野,英?定中?抑或好似有D人好攪笑地填香港?於是同事就會好有耐性的話俾佢地知香港唔係國家,請你再填,佢地就會好迷惘,甚至會問填咩有著數,哈,乜鬼都要搵著數,真係 笑死人,其實申報國籍係要自己先知,政府點會知道邊個在其他國家入了籍呢?自從香港回歸之後,所有香港的中國人都應該係中國籍,但 因為早前好多人歸化英籍,亦有唔少人擁有BNO護照,佢地都可以係英籍,所以就算填British或者Chinese都唔會有影響,而且都可以同時擁 有BNO同埋特區護照,根本無咩著唔著數,青蛙仔就得一本BNO護照,以往填國籍都會順手填英籍,而家都會開始習慣填番中國籍,大家又搵 番自己國籍未?

29.10.2002 (Tue) 晴, 晚上有雨
最近有連鎖快餐店都相繼減價,【美麗的心】的午市叉燒飯祗售十二蚊,雖然係限量發售,但都有唔少人受惠,但係唔知點解總係有多事之徒出來唱反調,有議員又話咁樣唔好,又會引起惡性競爭云云,青蛙仔真係覺得佢無野講搵來講,連減價都俾人話,都唔知咩心態;但總算 有另一位議員出來話,快餐店一齊減價係好事,大家可以留港消費,唔好成日北上香港先會好,青蛙仔覺得呢種說話先似點人話囉!

30.10.2002 (Wed) 陰雨,減薪日
羅文先生的遺體在昨日火化了,一代歌皇,歌在人心,大家都將會懷念佢好耐好耐,青蛙仔對陪伴在佢身邊不離不棄的助手真係好欣賞,呢份感情真係偉大,早前青蛙仔提過被一句歌詞感動,一生中能夠【臨別亦聽得到你講再見】,真係去得安樂,自己如果有呢種福份,應該係 幾生修到的事,題外話係傳聞話羅文先生因為堅信自己有得救,所以無立遺囑,唔知道佢去世之後的財產會點分配,青蛙仔唔信佢為醫病已 散盡家財,仲要爭人錢,劉培基先生都話一兩年來的醫藥費最多都係一二百萬,邊使得佢入肉,所以如果唔立遺囑都唔知點分配好,到頭來 最有資格得到一份的,可能因為無血緣關係而一個仙都得唔到,雖則話就話人都死了,有錢又如何,但佢助手照顧佢咁耐,要再搵番份工都 唔知易唔易,如果無D實在野傍身,佢生活都好徬徨,除非係羅文先生在世時已經交低好多野俾佢又唔同,青蛙仔咁八卦走去講錢好似好衰, 但呢個真係現實的問題,如果真係要分配財產的話,大家話應該分俾佢助手定分俾久未聯絡的親戚先?

31.10.2002 (Thu) 陰雨,萬聖節
相信大家都知道雜誌封面的裸照女星係邊位,今日公司都有同事談論呢件事,其中一位好討厭的女同事聲大夾無準,人地講少少佢已經慌死人唔知佢消息靈通,即時就講個女星個名,但各人都知道係邊個,都無人覺得出奇,跟住佢仲話要杯葛方向報,但當有同事話買左本野,佢 又話要借來睇睇,真係小蜜蜂佢啦,戒買唔戒食,最乞人憎,口話杯葛但又要睇,同發放相片的人一樣咁賤格,青蛙仔平時當呢個女人隱 形,但今朝真係忍唔住走出房同佢講,本雜誌唔係方向集團的,佢衰左都仲要撐,話方向集團都唔慌好野.........青蛙仔都費事再聽佢講, 即時入番房,關門開工。

其實青蛙仔雖然唔識呢位女星,祗係佢曾經同大哥拍過戲,所以在片場都見過佢化妝同唔化妝個樣,確係靚女來的,青蛙仔都幾佩服呢位女 星,最初來到香港完全唔識廣東話,但佢努力學習,成功考入電視台,一個女仔用姿色去搵食真係唔用易,期間都經歷唔少野,被豪門拒 絕,臨門撻Q對佢打擊好大,之後被人強擄,又再受打擊,到最後搵到個男朋友都仲係波折重重,但佢都仍然撐住,表現堅強,到今時今日都 仲有人挖舊事出來傷害佢,都算係幾慘,希望佢男朋友真係可以同佢共患難,支持住佢啦。

06.11.2002 (Wed) 陽光燦爛,非常好天
今晚又無街去, 放工就返屋企, 收到個電話, 個心一沉, 因為係早前提及過的一位年輕人, 因為入了傳銷公司, 種種其他因素之下, 青蛙仔已經同佢無兩句, 但佢又忽然間搵青蛙仔, 仲話約今晚出來, 青蛙仔話今晚唔得, 就一日再一日咁問青蛙仔邊日出得來, 不過青蛙仔對呢個 男仔已經好失望, 無打算再見佢, 於是同佢講你唔使再浪費時間了, 點都唔會加入, 佢就話梗係唔係叫你加入啦, 大家都係朋友, 見下面都 得掛, 青蛙仔仍然都係話得閒先打俾你啦, 於是就終止話題了, 唔知點解青蛙仔今次真係一點內疚都無, 真係唔想再同做傳銷的人有兩句了!

01.11.2002 No.139

15.10.2002 (Tue) 陽光普照
見到幾份報紙標題都係講蘿記身體有變,寅夜入院,當堂心情唔係咁好,睇來佢真係大限將至了,雖然好多圈中朋友都唔會講出真相,但 實大家都知道肝癌係唔會咁易有奇蹟,出名的神醫都不外乎係求財,唔一定真係識醫人,但係尚有一線希望,就算明知係假的都無人會想放 棄啦,咁樣發死人財的人,唔知收尾兩年會點過呢?

16.10.2002 (Wed) 陽光普照
今日報紙仍然係報導蘿記的消息,其實都在尋晚電視睇過,已經唔算太震憾,方向報的標題亦唔乞人憎,用【力戰癌魔,羅文撐到底】的字句,算係有鼓勵性,無令人唔舒服。

阿四個仔要坐幾耐,今日有結果,唔係青蛙仔馬後炮, 可能朋友都聽過青蛙仔話過佢可能唔使再坐, 同埋判社會朋務, 果然不出山人所料, 哈, 尋日傳媒就追訪同佢傳過緋聞的紋身女歌手,青蛙仔一向唔鍾意佢,大把人知,確實佢的言行有時係好有問題,今次又話自從阿四個仔 收監之後,晚晚同佢唸心咒祈福,本來唔係大問題,大把人臨訓會唸經祈禱,青蛙仔都有細佬臨訓前幫青蛙仔祈禱,但奇就奇在晚晚不特 止,仲要係晚晚唸一百零八次,青蛙仔一睇,108次?有無咁神心呀?青蛙仔唔知心咒有幾長,到底係一句說話幾個字,好似【南無阿呢陀 佛】咁短,定係好似心經咁長,但係無論如何,108次就肯定唔野少,一分鐘一次都成套戲咁長,佢又會唔會畫正字定係拎唸珠來數住自己唸 左幾多次呢?唔好話青蛙仔針對佢,青蛙仔亦唔係勞氣,但係就打下問下都唔會信佢,唔該佢節省少少!

18.10.2002 (Fri) 早上忽然紅雨,但元朗陽光普照
阿四個仔單案雖然完結,但仍然好似餘波未了,沒完沒了,都係祗怪佢年少氣盛又囂張,雖然有fans但得唔到民心,所以大把人想佢死,但其實同佢同日都有一位電台高層因一件案件而被判有罪,但就緩刑兩年,即係唔使坐監,但又無人出聲話唔公平,皆因呢位高層係一位音樂 家,一向形象正面,所以就算佢犯事都唔會有好多人想佢死,證明人心都係同法律一樣,唔係咁公平,但有一樣野好肯定話俾大家知,處世 做人要謙虛有品,待人以禮就唔會犯眾憎,萬一有事起上來都唔驚俾人踩多兩腳了。

午飯時間訓訓下聽到同事話羅文先生逝世的消息,忽然好平靜,並沒有即時彈起來再問,因為去了就係去了,人死不能復生,反而覺得佢得 到解脫係一件好事,其實佢在生之時可以瘋魔同娛樂了唔少歌迷,有多不勝數的好歌流傳下去,今生都算係不枉過了,返到屋企竟然峰迴路 轉地話佢尚在人世, 消息亂咁飛, 真係唔知信邊個好, 抑或係根本唔想俾消息咁早發放呢? 其實青蛙仔對佢病情都唔太樂觀, 如果佢一旦去 世,希望佢可以得到安息,真係有機會投胎的話,下一世都要用佢美好的歌聲感染人世間。

羅文先生在三十幾年的歌唱生涯當中,似乎都祗係同幾間唱片公司有約,而每一間都一定會有經典歌出現,絕不會令唱片公司及歌迷失望, 由早期的文志唱片,佢已經有首【前程錦鏽】唱足三十年;之後去到娛樂,有【小李飛刀】及數唔清的電視劇主題曲;跟住去EMI有【好歌獻 給你】及【獅子山下】,仲有同甄妮合唱的射雕系列主題曲,當時得令;之後轉去華星,【幾許風雨】又賣個滿堂紅;之後轉投星光及BMG, 聲勢雖不如前,但仍然有【壞情人】同【新版激光中】撐住;最後加盟飛圖及英皇,重唱其他歌星的舊歌,都無令人失望,青蛙仔慶幸睇過 唔少次羅文演唱會,每一次都有好深刻的感受,而且一定唔會失望,若然今次羅文先生真係去逝,幾間唱片公司一定會出精選碟來向佢【致 敬】,搵錢得來亦可以給新一代樂迷一個選擇,都算唔錯了,尤其係英皇,旗下已有幾位歌手灌錄好重唱佢的歌曲,當新歌聽之時亦可對佢 一種懷念。

雖然羅文先生的好歌多不勝數,有好多歌青蛙仔唱唔止百次,但最喜歡的並唔係最流行的歌,反而係華星時期的【把握】及【驪歌】,相信 好少人會聽過呢兩首歌,而且一般卡拉OK都唔會有得唱,青蛙仔曾經在V-MIX搵到唔係原裝版的【把握】,都唱過一次,而【驪歌】的原裝華 星版就在早期的北海漁村卡拉OK唱過,之後在其他地方都唔見有了,唔知係唔係得不到的就特別想念,青蛙仔先咁鍾意呢兩首歌!

最後,青蛙仔真係好多謝羅文先生,雖然青蛙仔同佢完全唔認識,但一早都當佢係老師咁向佢學習,用佢的歌曲來參加比賽同埋表演,得到 唔少榮譽,二三十年來,就算有聽同有唱其他歌手的歌,羅文先生仍然在青蛙仔心目中佔重要的地位,本來以為佢可以一直唱下去,陪著青 蛙仔到老,可惜..........

19.10.2002 (Sat) 陽光普照
尋晚打完篇日記已經好眼訓, 勉強頂多一陣都係要退出, 十二點前就上床訓了, 今朝好好天, 所以陽光一早就叫醒左青蛙仔, 七點幾真係好早, 結果得到近八點先真正起身上網睇野, 終於證實了羅文先生在尋晚十一點幾去世, 原來尋日下午的消息祗係幫佢拆喉讓佢自然死亡, 仲 有一啖氣都唔可以斷定佢係死, 堅強的意志令佢捱到晚上先正式去世, 但唔知佢有無痛苦呢?

晚上的三色台臨時製作了個半子時的羅文特輯, 雖然撰稿人唔係寫好多野, 主持人成日都係講住某幾樣野, 但青蛙仔仍然好用心咁去睇呢個 節目, 一邊睇一邊都幾感觸, 睇到最尾部份, 見到小春似乎都好激動, 唔似係做戲的成眶眼淚滾滾下, 青蛙仔都眼濕濕, 青蛙仔唔敢講永遠 會懷念佢, 但相信仍然有一段好長的日子會聽佢的歌唱佢的歌.........

21.10.2002 (Mon) 早上黃色暴雨及雷暴警告
睇到報紙一段廣告,教人自我測驗抑鬱症,相信大家都唔會有,不過參考下都幾得意,大家睇下過去兩星期有無經常出現以下情況,如果出現四個徵狀又包括2、5、10的其中兩項,尢家就要睇下醫生了。

1. 以前喜歡的事突然唔再感到興趣。
2. 成日感到疲倦、唔想活動甚至對任何事不感興趣。
3. 失眠或者過度睡眠。
4. 胃口欠佳或飲食不懂節制令體重驟變。
5. 情緒低落,長期感到唔開心同空虛,又無故流淚。
6. 時常坐立不安,精神緊張。
7. 動作作、言談同思想都比以前緩慢同遲鈍。
8. 久缺自信,過份自責同內疚。
9. 自覺判斷力、注意力及記憶力大大退步。
10. 感覺生活苦悶、無目標及無意義,對人生悲觀絕望。
11. 經常想死。

其實青蛙仔都有7同9兩項,好在都唔算係抑鬱,唔知大家又有幾多項中左?

18.10.2002 No.138

29.09.2002 (Sun) 晴, 間中有微雨, 世界心臟日, 亞運揭幕
睇勁歌的季選, 覺得時代真係唔同了, 豬肉獎多到數唔到, 新人背出, fans都唔知係真心定假意, 老一輩的與新人格格不入, 安排沙麗打頭陣係明智的, 首歌難度真係好高, 唱現場都幾吃力, 但事實係一首好歌, 青蛙仔有機會都練來去K唱下先, 跟住又係一首青蛙仔喜歡的抱抱, 所以都可以吸引青蛙仔繼續睇落去, 主唱者現場同錄音真係差好遠, 令青蛙仔有點失望, 因為今晚聽現場完全無感動的感覺, 錄音的功效真係神奇, 跟住九塊曲奇餅真係睇到笑, 呢次係青蛙仔第一次認認真真咁觀察佢地演出, 實在唔掂檔得緊要, 有幾個連口都費事郁, 硬手硬腳, 到底鍾意佢地支持佢地係咩人來架? 之後又有浚龍哥仔出場, 真係無說話好講, 另一位女新人, 改個日本名, 係就係長頭髮, 不過一睇佢身型就知佢夠件頭, 所以著衫都要遮遮掩掩, 再聽下佢首歌, 嘩, 乜咸濕得咁緊要, 世風日下, 都唔知邊個作的, 好離譜, 唔好話青蛙仔心邪, 事實唔信作者唔係咁諗! 仲有講埋醫神, 在此青黃不接的時期, 仲未成為超級一線的歌手, 佢已經屬於過氣, 都幾唔抵, 所以今晚見佢都唔係好有光采, 都唱得好求其, 唔通唔舒服? 其餘? 唔講咁多了!

30.09.2002 (Mon) 晴,公益金便服日
今日係便服日,青蛙仔一向都著便服返工,所以都無呢種捐錢的衝動,但聽聞都有學校支持,學生祗須捐十蚊以上就唔使著校服,相信都會有唔少學生想著便服返學而叫父母捐錢,其實諗呢條橋出來的人都幾有腦,近幾年仲搵埋【天濛光】做代言人,唱埋主題曲來呼籲,青蛙仔 就諗,【天濛光】人氣漸漸下降,唔知佢仲可以做幾耐代言人呢?如果唔用佢,又有邊個適合呢?

01.10.2002 (Tue) 陰, 國慶日
其實尋晚都成三點先訓, 今日諗住放假可以訓晏少少, 結果又係要起身, 洗完面之後, 兩老都買完報紙返來了, 一拎起份報紙就見到唔開心野, 講到蘿記的病情似乎唔太樂觀, 個心一沉, 雖然大家互不相識, 但蘿記的音樂陪住自己成長, 佢有事個心始終都係唔安樂!

02.10.2002 (Wed) 陰、雨
踏入十月份,公務員正式要減薪了,青蛙仔月尾份糧就會扣少少錢,講真又唔算好多,但都夠睇戲食飯兩次,可能青蛙仔仍然會照平常咁想睇戲就睇戲,想食飯就食飯,但可能有部份公務員會因此而出少兩次街都唔定,在此低迷市道,又有更多人不再消費,香港又點會好,到底 夾硬要減公務員的人工,對邊方面有好處呢?

每年都會有人趁國慶就攪事,今年都唔會例外,青蛙仔真係唔明點解要在升旗咁莊嚴的儀式來攪,又棺材又燒國旗,自己對國家咁唔尊重, 人地又點會支持你做任何野先?至於【數字行動】的長毛成員被拒絕進場,事實係無可厚非,有無人信佢真係咁乖去齋睇先?就算係真都無 計啦,邊個叫佢地往績豐功咩,要睇就唔該佢返屋企睇電視啦! 青蛙仔覺得咁多人想阿四個仔死, 其實有無諗過, 呢班人的罪行, 比阿四個 仔重好多啦!

03.10.2002 (Thu) 陰,早上清涼
可能都會有人估到青蛙仔會講下【阿四個仔】,因為近來都好八卦地跟進單案,尋日佢終於要收監,不過都仲要等成兩個星期先知判幾耐,呢種待判的心情一定係好難受,使完幾百萬律師費仍然幫佢唔到,證明香港都仲算係公平的法治之區,既然佢都得到懲罰了,大家可以放過 佢啦,踩多腳又唔會生多D肉,何必呢!

07.10.2002 (Mon) 晴,清涼
返到屋企剛剛可以睇到電視介紹大哥的專題報導, 無論你喜唔喜歡佢, 又或者佢在香港聲勢已下跌不少, 但在外地仍然係極度受歡迎, 祗見佢在美國街頭受到唔同國籍的影迷的支持, 青蛙仔內心真係好開心, 而且睇見外國的朋友雖然係擁戴佢, 但絕不瘋狂, 非常斯文, 唔會好似 香港的fans咁癲狂, 其實真係值得學習, 尤其係避鏡頭的fans, 點解唔可以抬起頭來話俾人知, 你支持邊個呢? 因為自己都羞恥? 哈!

10.10.2002 (Thu) 非常好天
今晚約左幾位朋友睇【特務踢死兔】, 雖然今晚開畫的票房似乎麻麻, 一來係平日, 二來無價減, 不過青蛙仔仍然抱住大哥出品差極有限的心態來睇, 唔會對佢失信心!結果非常輕鬆愉快地過了一個半小時, 大哥果然無令人失望, 首先講攪笑程度, 來得比火拚時速更乾淨更攪笑, 而且今次先算係佢個人表演, 英語對白對佢來講已經唔再係難事, 雖然有唔少特技幫佢完成某些動作, 但都睇得到佢係有動作設計, 係略嫌個故事未算完整, 奸角又唔係深入得太奸, 所以佢被擊敗時無種大快人心的感覺, 不過總括來講, 青蛙仔仍然覺得呢套係大哥保持水準之作, 並唔係傳言得咁差, 睇左一定會講句唔差喎!

04.10.2002 No.137

17.09.2002 (Tue) 陰雨,山泥傾瀉+雷暴+黃雨警告
黃昏時收到個消息, 有位好朋友即將遠赴他方另謀發展, 其實呢個都係一個好消息, 不過總係有點意外, 同埋好唔捨得, 不過而家通訊咁先進, 就算去到邊都一樣可以聯絡, 分開下唔知會唔會係一個考驗, keep得到的就永遠都係好朋友, keep唔到的, 就算留在香港又如何? 在此 祝呢位朋友前程遠大, 早日實現理想, 發左達唔好唔記得青蛙仔, 哈!

18.09.2002 (Wed) 好天了,九一八事件七十一周年 下午又見到個有趣的英文名,青蛙仔真係好想問個男人係咪真係咁掂檔,不過都係忍住口無問,但都忍笑忍得好辛苦,竟然會有人改個名叫 做JERSON,除左徐錦江之外,真係諗唔到有人咁夠膽,哈!

近日戲院單日的票房跌破新低,有日嘉禾港威的四點場竟然係零,真係影業淪埳,因此片商同院商有意將減價的日子擴大到星期一至四,青 蛙仔都幾歡迎,因為戲飛平D,睇戲意慾會高D,唔會揀得咁緊要,想睇就會睇,而且平日的下午場多數係閒人或者係sales幫襯,如果唔減價 根本好難入場,希望遲少少大哥套【特務踢死兔】可以刺激下個市啦!公務員下個月就減人工了,大家覺得下一樣係咩減價好呢?地鐵?定火車呢?

19.09.2002 (Thu) 陽光普照
最近過氣天王【天濛光】又出新碟, 唱片公司都好俾面, 仍然當佢係一哥咁宣傳, 但以青蛙仔所見佢已經好似唔係咁夠光彩, 出席記招的服裝難睇到不得了, 佢隻新碟的封面更加係普通得緊要, 既然當佢係一哥, 點解個封面好似求其影張相就算? 無設計就等於特別? 大家都知佢 都唔細, 張相好似執都無執過, 真係極度有信心, 呢個情況忽然令青蛙仔想起【我右眼見到神】呢套戲, 所有片頭設計, 海報等等都係簡單 過簡單, 明顯地製作費全部都落曬入女主角的片酬度, 【天濛光】的情況可能都差唔多!

20.09.2002 (Fri) 陽光充沛,迎月
最近有單少女被姦案,又係遇人不淑,在ICQ識到壞人而被侵犯,呢種無知少女在香港多得很,都唔同情得咁多,其實青蛙仔祗係想講下傳媒真係令人啼笑皆非,竟然用ICQ少女來形容個女仔,無非都係想強調ICQ會識到壞人,家長睇到又會加深誠見,但係件事情係個女仔在ICQ識人 兩日就單獨跟人車,仲去埋貨倉,大家覺得到底問題出在個女仔定係ICQ先?

24.09.2002 (Tue) 陰雨
受癌症折磨了多年的主教終於都蒙主寵召,上天堂享永生,真係唔明上天要俾個咁大的試練佢先可以上天堂,其實有無人係無風無浪,一生平和都可以上天堂呢?主教的去世在教區和教友來講,當然係一件大事,不過幾百萬人口,信訓覺的人始終佔大比例,所以主教去世的新聞仍然唔可以放在正版頭條,因為一隻小動物的死亡比佢更重要,尤其係由人氣偶像帶住,仲諗住帶埋上法庭【陪審】,記者仲唔忙咩,可惜都係影唔到小動物的【遺體】,都算失敗。

25.09.2002 (Wed) 陰雨
呢兩日阿sir同同事討論一個問題, 講足了兩日, 大家意見不一, 青蛙仔祗係做旁聽無搭咀, 留番響青蛙日記同大家傾下, 阿sir話識得男女唔可以平等, 如果要結婚的話, 女方一定唔可以叻過男方, 即係話如果女方係一個主任級的職位, 學識又好, 就無可能會嫁一個低級兼學識 又唔好的男人, 就算勉強結合都係會離婚收場, 如果男女調轉就無所謂, 後生女同事就覺得愛情至上, 唔係太大問題, 但阿sir就向現實方面 諗, 都係無可厚非, 青蛙仔都會同意佢咁講, 話就話時代進步男女平等, 但係女方搵得多錢的話, 男方永遠抬唔起頭都幾無癮, 除非男方有 心食拖鞋飯, 如果唔係又有邊個會甘心俾其他人睇到自己老婆叻過自己呢? 大家又認為呢?

27.09.2002 (Fri) 晴,出糧日
今日已經係農曆八月廿一日了,每年呢個時候都會有店舖售賣過時月餅,今年元朗都有,不知名牌子的雙黃蓮蓉一百蚊三盒,青蛙仔真係唔知有咩人會咁恨食而去買,如果食左有事又唔知有無人可憐,其實唔好話在街度大把月餅,青蛙仔公司到今日仲有同事帶月餅返來分甘同 味,青蛙仔就一小格都唔敢食,而自己屋企個雪櫃都仲有有一盒兩老當係寶的月餅,過埋呢兩日佢地再食唔曬的話,青蛙仔就會出手了!

青蛙仔好背,今日睇報紙先知原來運動比賽係可以合法詐輸來走線,可以選擇對手,更容易贏冠軍,中國女排就在世界錦標賽用此【策略】 而受評擊,原來國家隊在乒乓球賽都係慣常用此方法先會做長勝將軍,咁樣做法又真係唔係幾好,俾年輕人知道之後會影響好大,因為可能 會改變佢地做人的方針,為求目的就要走精面、不擇手段,就算而家佢地出來道歉又如何?擔唔擔保以後唔打假波先?誠信已失去,唔係話 原唔原諒的問題,因為回頭已是百年身了,年輕人切記唔好行差踏錯!

早前在北京的一個中日友好演唱會,發生了不愉快事件,終於有個夠份量的【校長】出來評理,所謂【日本天后】去到人地地方都態度囂 張,唔代表佢有咩咁巴閉,此舉反而羞辱左自己國家,因為日本人一向有禮,去到人地國家竟然唔抵李玟小姐威過佢而發爛渣,呢種行為真 係唔要得;雖然香港好多人鍾意佢,但青蛙仔覺得佢祗係一般,個樣人工化得緊要,歌亦唔見得好好聽,如果連人品都唔好的話,真係唔知 佢有咩好了。

20.09.2002 No.136

02.09.2002 (Mon) 晴,間中有雨,開學了
青蛙仔成日都要對住唔同的出世紙, 發覺大部份人對張出世紙好似有仇咁, 祗係得幾歲或者十零歲, 張出世紙就已經爛溶溶, 到底唔知佢地成日拎出世紙來攪咩呢? 青蛙仔幾廿歲人, 張出世紙都祗係隨年月而發黃了, 同埋係摺到細細張咁, 絕無佢地一岩一忽咁難睇, 大家張出世 紙又見唔見得人?

04.09.2002 (Wed) 晴朗
睇娛樂版見到個位偶像歌手的家姐搏宣傳的手法好低, 不禁搖頭, 佢話做歌手的壓力好大, 近來因為工作忙到姨媽都唔得閒探佢, 攪到肚谷谷, 要睇中醫先攪得掂云云, 青蛙仔覺得使唔使連呢d野都講俾人知呀, 遲D如果便秘唔知又會唔會講出來呢? 呢樣野令青蛙仔記起某高妹天 后級歌手, 當年做一大型節目要吊高佢來表演, 佢綵排完之後竟然同記者講吊高好辛苦, 連用緊個塊生理護墊都扭歪了, 真係睇見都嘔水, 青蛙仔一直對佢無好感到而家!

05.09.2002 (Thu) 晴
今日方向報的全版頭條又係與港聞扯唔上關係,祗係一個城中玩家的破產消息,真係唔知到底有幾多人會有興趣睇,青蛙仔反而覺得內頁報導美孚某酒樓事先張揚會結業,老闆有情有義,講明變賣物業來套現都唔會拖欠薪金,所有買貨帳項亦會計清條數,仲要求下一手老闆優先 聘用舊員工,呢種做法令人欣賞與敬佩,比起個種拎住舊錢唔出聲,拉大閘摺埋都無人知,唔理員工死活的衰人,真係差天共地,起碼呢位 老闆仍然可以堂堂正正生活下去,百幾個員工甚至家人都會記得佢咁有道義,如果袋住畢錢有一半係人地血汗錢來的,又點會使得安樂呀?

06.09.2002 (Fri) 晴 + 酷熱警告
睇報紙又見到住何文田個女人三日內兩度跳樓,仲要係同一班消防員去救佢,住佢樓上的住客第一次就開門俾消防員入屋游繩救人,第二次就拒絕再開門,原因係有老人家因病在休息,加上個女人成日都係咁,點救得咁多,青蛙仔都好同意佢所講,唔覺得呢個戶主冷血,人地要 死就俾人死啦,浪費咁多人力物力救完佢,係都要再死,但偏偏佢又要玩野,唔揀夜闌人靜一跳就跳,係都要等人見到,消防到齊先跳,真 係離奇,其實警方係唔係有權控告呢種人,困住佢在精神病院架?

地鐵又有事故發生,千人受影響,新聞圖片所見,成個大堂都逼滿人,大熱天時都幾慘,青蛙仔唔係話幫地鐵,其實佢地點會想有呢種事發 生丫,可能青蛙仔唔係身受其害的乘客,咁樣好似講風涼話,無疑地鐵係應該要檢討,唔可以再有同類事件發生,不過鑊鑊新鮮鑊鑊甘又幾 令人頭痛,但係受訪市民講到好似因為咁而同地鐵十冤九仇,話以後唔搭地鐵之類的說話,青蛙仔真係唔信呀,而家將軍澳地鐵咁方便,唔 搭佢即係同自己過唔去,地鐵真係好驚你一個唔幫襯佢架!

10.09.2002 (Tue) 初時以為會晴朗, 點知落大雨, 仲一號風球
今朝睇電視新聞,報導兩間超市的【長者優惠】詳細到好似廣告咁,青蛙仔同老爸兩個一齊睇住,了解到呢種優惠對青蛙家都算係唔錯,因為兩老幾乎日日都去超市購物,一個月的支出起碼都會有四位數,就算係一千都慳一百啦,優惠到年尾,即係三四個月,應該都慳到四五百 蚊,夠兩老食好多日早餐了,所以青蛙仔好歡迎呢種做法,並唔同意個D所謂學者在報紙的言論,話咩變相搶客,令細舖更難生存,又話會攪 到D後生會使D老人家去買野,真係唔明D所謂學者,總係要唱反調來突出自己,青蛙仔係承認會使兩老去做野,但都係無可厚非,大家分工合 作,有時老人家時間多,做下呢樣做下個樣先易打發時間,有野做亦可以更加覺得自己有存在價值,所以青蛙仔想買禮券或者本票之類的 話,一定會叫老爸幫手去樓下架間LCH銀行,因為長者唔使手續費,而且間銀行又唔算多人,容易過青蛙仔去辦呢種事,話題扯得太遠,總之 人地肯提供下優惠總好過咩都唔做丫!

11.09.2002 (Wed) 天氣惡劣,三號轉八號風球
真係係唔明點解大部份排隊都係好唔安份,明明前面的人辦理緊事項,後面個永遠唔會乖乖的等,總係會企在人側邊裝裝貢,明明樣文件又唔係佢,係都要眼甘甘咁望望望,有時青蛙仔會叫佢地唔好睇人,佢地都唔會覺得唔好意思,都幾討厭,呢樣野同在櫃員機排隊一樣,後面 的永遠唔會安安份份,總係要睇下前面攪乜鬼先安樂,青蛙仔多數會同前面拎緊錢的人保持距離,有時會被後面個乞人憎人借D意推推貢,意 思係【點解你唔行前D】,青蛙仔心諗,行咁前替死咩,人地係未攪完,就算你貼住佢背脊都係未到你啦,鬼唔望青蛙仔拎完錢之後就暫停服 務呀!大家有無咁經歷?

13.09.2002 (Fri) 開始轉晴,黑色星期五
今日睇到本年青人雜誌介紹近來好多是非的人氣偶像【魚樂仔】,仲未到廿一歲,原來咁細個,唔怪得佢甩個【紋身女友】甩的咁快啦,人氣偶像點可以容許有個咁樣的女朋友呀,佢就算肯,佢經理人同唱片公司都唔肯啦,此舉真係明智,速速劃清界線先會受女歌迷歡迎,青蛙 仔雖然知道最近仲有【龍哥仔】同【南面著火】同佢好多是非,不過除左在巴士聽過下佢地的歌之外,根本就極少聽佢地唱歌,所以都唔知 佢地邊個潛質好D,今日就以師奶阿叔的身份來湊下熱鬧,將佢地作個短評:

青蛙仔覺得三個之中,【魚樂仔】最靚仔,但靚得來有對反骨耳,似係靚仔無本心個種,(當然呢種評語係唔關【紋身女友】事,因為係人都會飛佢!),不過花心大少就多數受歡迎,睇來佢要上位都唔難;【南面著火】把聲比較薄,歌唱技巧仲要努力,不過佢個樣勝在夠乖仔,要 入屋就真係唔難,俾大公司欺壓又幾值得人同情,希望佢努力,俾番D顏色人睇下;至於【龍哥仔】,青蛙仔覺得佢最大壓力,講真老豆有錢 唔係罪,錯在太多人唔抵得,樹大永遠招風,細小到連forum都可以係咁,何況娛樂圈,所以青蛙仔反而想睇佢努力出頭,圈中大把樣唔靚的 人,搖完頭勒完戒都一樣受歡迎,如果充實好自己,有好歌出來的話,青蛙仔一樣會聽會唱;

【龍哥仔】令青蛙仔諗起公仔廂一樣有個靠有錢老豆入行的【賢仔】,雖然佢樣唔靚,永遠唔會有重要角色做,但佢仍然好努力,青蛙仔睇 住佢進步,而家佢記稿同埋口才流利,趕時間之時講說話又快又清楚,青蛙仔好服佢,可惜佢個樣真係仲差少少,做司儀都確實係明智!

05.09.2002 No.135

16.08.2002 (Fri) 晴
今日睇報紙又一單地鐵車門夾親乘客的新聞,不過青蛙仔覺得有點一面之詞,過程又唔詳盡,報紙的圖解真係十分有趣,車門竟然係夾到個女子的頭部,如同賽跑衝線的姿勢,另一位救佢的朋友就被門夾到下一站先甩身,按緊急制都唔停車,仲話隻手被夾過之後產生痲痺,從事飲食業的她好擔心會永久傷害云云,完全係有咁大作咁大,青蛙仔不在現場,唔知個實際情況,總係覺得如果有秩序同埋安安份份上車,之後唔再靠近車門,發生意外真係好微,至於按緊急制唔停車就梗係啦,根本就唔係停車制,點會停車?如果個個得閒又按下,部車真係唔使開了,就算真係夾住手,又真係抽唔番出來都唔會半路停車開門啦,到時又有人跌出車點算?就算真係無人跌出去,都一樣有攪事之徒話途中開門係點點點危險,至於講到隻手痲痺兼永久傷害咁嚴重,明眼人都知佢想點啦!

20.08.2002 (Tue) 一號風球除下,陰雨
近日兩位女歌手生日,年紀祗不過係三十出頭,一位離了婚、有個幾歲的女兒兼攪忘年戀,歷盡滄桑竟然都祗係三十三歲,另一位未成年就出道,到而家日日撻成擔祕密鎖匙II上塊面都唔靚的天后,都祗係三十歲,娛樂圈真係好極端,有人可以keep到幾廿年如一日,好似米雪、 譚玉瑛姐姐、陳安瑩,甚至沈殿霞,如果唔識佢地都唔會估到幾多歲,皆因佢地得天獨厚加上保養得好,反而好多剛出道的小女孩濃妝艷 抹,以為佢二三十歲,但竟然未成年,而男星保養得好的公認有年過七十的修哥,仲有阿腎、校長,而年屆八十的傳奇人物燊哥更加雄風猶 在,魄力驚人,證明男人的保養功夫都有一手,其實保養並唔可以靠速成,點可以話下個星期要靚就撻七塊野上面咁簡單,如果唔係長年累 月由後生做起,根本就無可能,天生好樣唔係咁容易,想靠後天來彌補不足,唯有要勤力點了!

22.08.2002 (Thu) 陽光燦爛的一天,盂蘭節
今日係盂蘭節,唔知大家會唔會唔出夜街,乖乖返屋企呢?其實多年前的香港舊區,每到盂蘭節前後都會好熱鬧,因為盂蘭節係潮州人的大節,多數會在空地或球場搭棚做神功戲,又會派米俾老人家,前後慶祝幾晚,正日當晚仲幾乎通宵演戲,熱鬧到不得了,隨住時代轉變同埋 好多限制,今時今日已經少左好多團體攪盂蘭勝會了,甚至好多後生仔根本唔會留意今日係咩日子,更加唔會驚鬼門關開放呢個傳說,反而 對上一代的關心嗤之以鼻,鬼搵替身呢樣野, 而家連電影都唔會用來做題材, 時代與科技進步,【鬼與神】漸漸都被【人】看輕了, 但燒街 衣呢樣野, 仲仍然隨處可見, 康文署的職員, 聽日又要忙於清理街上的灰燼同芽菜了。

24.08.2002 (Sat) 陽光普照的周末
又到周末了,雖然無特別安排節目,但可以放下晝, 天氣又好,加上最近幾日唔係太夜訓,所以精神都算唔錯,晨早睇睇到新聞片,講及國內廠家向本港青年招手,邀請佢地返去內地打工,中學畢業的人工祗係二千蚊,大學畢業就四千蚊,待遇竟然比香港的菲傭仲低,呢樣野係 千真萬確,青蛙仔有個外甥亦曾立志在國內教書,初時傾條件時已經知待遇低微,但因為有宿舍同埋算係佢的志願,於是都諗住試做一個時 期,點知上到去之時再度俾人壓得更低價,又係低到唔可以接受,終於決定都要返香港,而家搵到份八千蚊的工,都算幸運了!

26.08.2002 (Mon) 陽光普照
今日真係無野好講, 於是又搵娛樂野來講下, 相信最近大家都知道有唱片公司一擲幾百萬去捧個完全唔靚的男仔, 所以出到街好似度度都見到呢位龍哥仔的蹤影, 青蛙仔淨係在巴士上睇過佢的MTV, 跳舞都算唔錯, 但係唱功就因為太細聲而聽唔真, 所以都唔敢點下評語, 淨係覺得用幾百萬來宣傳, 到底要賣幾多隻CD先可以收得番呢? 呢種手法攪到一哥黑人都要出來吃不到的葡萄, 潤下位小朋友, 不過青蛙仔覺得黑人唔應該咁做啦, 相信佢無理由唔知呢位哥哥仔的來頭唔細, 話唔定幾百萬宣傳費未必全部係公司出呢, 況且香港歌迷的口味好怪, 講唔埋佢真係一聲彈出來, 到時睇怕黑人仲激氣添呀!

27.08.2002 (Tue) 晴
今朝睇到份方向報,頭條全版都係講過氣藝人的私生活,估唔到尋日香港無其他新聞值得上頭條,真係唔知可喜定可悲,如果咁樣的新聞都算新聞的話,青蛙仔寧願揀【川氏】新大碟未出街已經在網站有得下載的新聞做頭條,因為表面好似係娛樂野,其實肯定有閉門失竊母帶、 偷錄的刑事成份,如果再唔正視的話,容乜易第日在網上聽厭首歌,隻碟都仲係有排未出得街架。由【川氏】呢單野令青蛙仔諗起,其實唱片界的錄音工作,多數係有班底,通常有個助手跟住監製學錄音,比較小圈子,外人想入行而無人事就唔係咁易,同類地好多行業都係單傳而令人材凋零,中國人的傳統思想,令中國進步得太慢了。

30.08.2002 (Fri) 晴,出糧日
今朝睇到段國際花邊新聞,話英國的蘇豪區有一藝術館正展出一對夫婦,佢地生活在一個透明的房間一個星期,所有生活起居包括飲食及做愛都會供人欣賞,稱之為【行為藝術】,其實香港都曾經有呢類【藝術家】,潑紅油在維園的女皇銅像,視法紀如無物,青蛙仔真係唔識欣 賞呢D藝術,甚至覺得佢地濫用藝術呢樣野,到底今次入場的觀眾係唔係用藝術眼光去睇人地做愛先?仲有,所謂藝術家放個屁都可能香D, 睇住佢大便又感受到藝術?成奎安去做就會俾人話核突?相信如果真係藝術的話,係唔會有分界限,係人都可以表達出來;青蛙仔忽然覺得 藝術同宗教好相似,無疑有人在默默耕耘,青蛙仔一定會專重佢地,但樹大有枯枝,青蛙仔唔會認同甚至睇唔起藉藝術或宗教為名義來做一 些唔適當的事情,大家又點睇?

23.08.2002 No.134

03.08.2002 (Sat) 陰雨、間中晴、一號風球
睇晨早新聞見到外國有間朱古力製造商話請人,因為服務了十三年的試朱古力員最近辭職,其職務係周圍去試下其他產品的味道與款式,知己知彼,而且人工仲有港幣三萬幾一個月,青蛙仔佩服佢可以日日食朱古力食足十幾年,唔知舌頭會唔 會因此而變得麻木呢?不過薪水咁好又好似係優差咁,但呢D錢對青蛙仔來講就肯定搵唔到,唔好講話做咁耐,睇怕連續食 一個星期都已經百病叢生了,大家又有無興趣做?

下午同朋友去賜睇【天脈傳奇】, 雖然套戲的特技比唔上真正的荷里活奪寶戲, 但青蛙仔絕對唔係為睇特技先入場, 係想捧楊紫瓊的場, 套戲的開場模式極似臥虎藏龍, 連頭一幕的空中飛人表演的配樂都與臥虎藏龍的楊紫瓊同章子怡對打一幕如同出一徹, 不過都拍得幾有美感, 開個頭開得唔錯, 加上楊紫瓊的拳拳到肉對打, 以一個女性來講, 唔係咁易做得到, 但後來用到特技的藏寶地方就顯得唔夠功力, 夾硬來了, 不過成套戲的鏡頭真係運用得幾好, 有好上景係拍得幾靚, 美中不足係俾主要鬼佬睇, 所以所有中國人都要講英文, 如果可以好似臥虎藏龍有原裝國語版的話, 相信會更好睇, 青蛙仔同佢地講, 如果連"我左眼見到鬼"呢D戲都肯拎錢出來睇, 點解唔可以去睇埋天脈傳奇?

06.08.2002 (Tue) 霤暴警告、黃雨
今日方向報的全版頭條報導有律師癡戀銀行女職員,祗係見一面就展開瘋狂追求,過時過節包括兒童節、婦女節都會送禮物,包括心形金牛、金撈等等,該名女子頂唔順佢不斷騷擾,因此報警拉人,照青蛙仔睇,真係疑點重重,又話未見過 人,但又收人咁重禮物,最趣怪係仲要回覆一些打情罵俏而又咸咸濕濕的咭俾人,又話人最高記錄在半小時打99次電話俾 佢,青蛙仔就諗,半個鐘得30分鐘,即係1800秒,亦即係平均唔夠廿秒就打一次,都未來得切聽又收線了,真神奇,睇下 兩位主角的樣,女的都算高佻,樣貌中等,男的年紀唔算大,但頭髮就剩低好少,可能因此未必咁易搵到女朋友,唯有用 銀彈打動美人的芳心,不過青蛙仔總係唔信個女仔未見過人就會接受人的金撈,仲話要被逼戴住返工,此外亦有唔少證供 充滿疑點,連個裁判官都唔信,件事要過幾日先判,到時睇下點啦!

07.08.2002 (Wed) 晴,間中有雨, 放榜日
今日又有一單借ICQ來發揮的少女被騙新聞,話說舊年有一廿歲女在家中準備考試,無意中在ICQ識左個三十歲的消防員,第二日就出來見面,少女形容該男子非常喉急,第一次見就攬腰拖手,跟住無耐就有BB了,哈,青蛙仔睇見真係笑出來, 又話人喉急,但又同人上床,一切都係自願就有咩說話好講,咁隨便的女仔就算唔係ICQ都一樣有機會在其他途徑去識到男 仔啦,關咩ICQ事,況且個男人又唔係話好似方中信咁有型,祗係個樣貌普通而又大肚腩的人,個女仔仲話佢有唔少女朋 友,青蛙仔都好想知佢有咩本事會呃到咁多人,無知少女真係通街都有咩?

09.08.2002 (Fri) 黃雨、雷暴、水浸警告樣樣齊
相信大家都會有送野俾朋友的經驗,其實大家會唔會期望朋友有咩反應呢,抑或求其就手,送完就算,話之佢鍾唔鍾意 呢?有時見朋友將份禮物珍而重之、又或者合用甚至常常都有用(例如衫或者飾物),自己見到都會有一份喜悅,如果人地 唔合用或者好快就唔知放左去邊,甚至輕視份禮物,自己自不然會唔開心,同埋怨自己眼光差,但有時份禮物太好都有煩 惱,青蛙仔試過送份禮俾朋友,係佢好耐的心頭好,該朋友確實好喜歡,甚至日日隨身帶住,但唔使幾耐又唔見佢帶出 來,青蛙仔當然唔好意思問,但後來竟然出現在佢女朋友身上,原因係佢女朋友都好鍾意,於是佢就轉贈俾女朋友,此舉 令到青蛙仔唔開心了一陣子,雖然禮物送左俾人就係人地,點處置都唔關其仔人事,但係明明係佢自己選擇,然後先轉送 俾人,青蛙仔有點被利用的感覺,祗有嘆句無奈,大家遇到咁情形的話,會點呢?

11.08.2002 (Sun) 非常好天
今晚睇香港小姐決賽, 相信大家都知道獎項歸邊幾位小女孩, 青蛙仔的三重彩輸左, 不過都無所謂, 反正其實邊個 贏都唔關青蛙仔事, 不過青蛙仔想講下今年真係好多表演嘉賓, 開場的莫先生唱青蛙仔最喜歡的英文歌之一, 原來個key都 唔算太高, 青蛙仔都唱得喎; 估唔到連最受歡迎男歌手都爭唔到獨立演出, 竟然有少少似陪襯品, 難怪佢越唱越無心機咁; 跟住跳拉丁舞的兩位, 緊張到面部肌肉拉緊, 完全都費事夾首歌的口形, 大家就可以知道, 之前劉華拍住位拉丁舞后可以 演出得咁好, 實在要付出好大的毅力同天份先做得咁好; 另外的幾班青春歌手組合幫三色台慳唔少錢, 又唱又跳, 連dancer都唔使請, 不過青蛙仔想睇真幾塊曲奇餅都唔得, 連一個近鏡都無, 真係無癮; 最後阿J現場彈奏加歌唱演出, 雖然有分加, 但青蛙仔對佢的歌藝仍然你不予置評, 唔敢講佢唔好, 費事俾人鬧俾人打!

15.08.2002 (Thu) 晴
最近地鐵的新車頻頻夾親人,記者就偷雞走去用本書簿來試隻門的敏感度,結果度門夾住1cm厚的書都照樣開行,仲影埋出來,地鐵就表示咁樣做係犯了地鐵附例,議員就話地鐵唔正視仲兼發爛渣,青蛙仔就覺得一單還一單,其實地鐵一向都有提醒乘客小心車門,又呼籲大家唔好做蠻牛亂衝,趕唔到就搭下一班,但係好多人都係當耳邊風,大部份的責任都應該要 自己負番,而記者唔從正途去探討隻門,反而偷偷地去做測試,萬一造成意外而影響乘客,佢付唔付得起呢個責任先?議 員完全唔覺得個記者有問題,仲要話地鐵發爛渣,青蛙仔覺得呢種唔係大將之風,直頭係幫埋手嘩眾取寵,諗住自己又踩 多腳就實無死,梗會有市民開心,但係唔好忘記咁樣即係助長人犯法,第時可能有人話金庫保安唔夠,然後入去偷金,報 警拉人之時佢又出來話金庫唔穩陣,引人犯完罪又發爛渣,咁點算?

09.08.2002 No.133

21.07.2002 (Sun) 陽光普照, 晚上有雨
睇見同刊與報紙, B哥哥同佢前妻終於都因財而罵戰, 本來大家都話終止話題唔再講對方, 但始終都沉不住氣, 再互數對方不是, 所謂無冤不成夫婦, 前世總可能係冤家, 今世先會湊成一對, 稍有風吹草動, 都好難白頭到老, 少不免都會向其他人傾訴一下, 心事被傳開之後, 大家都會覺得受傷害, 為了自保唯有將唔好野推在對方身上, 但佢地都已經係遲暮的紙上明星, 又有幾多人會有興趣去睇呢? 暫時來講, 青蛙仔好佩服奪麵雙琪事件的邵小姐同鄭先生, 因為佢地一直都保持緘默, 根本無人會知道內情, 佢地亦唔會企出來互數對方; 而鋒菲戀的菲菲更加在口上加了拉鍊一樣, 呢種性格真係難得, 唔知佢有無偶然都同朋友傾訴一下心事呢? 如果係無得話, 感情點舒發出來? 谷得多唔知會唔會生癌呢? 唉!

22.07.2002 (Mon) 陰雨
尋晚罕有地全套港姐準決賽睇完,雖然祗係得一兩個比較好樣,但今年的節目都算安排得唔錯,起碼唔會集中在表演嘉賓身上喧賓奪主,青蛙仔見到班十幾廿歲女全部都無偷懶,無論有無天份都好,都表演得非常落力,相信排練了唔少時間,值得一讚,反而三個司儀就唔夠默契,仲久唔久出錯,擺明就係排得太少,以為自己出場經驗多而疏於練習,其實係唔值得原諒,但鬼叫佢地仲係當紮,後生仔女反而鍾意食生煎大蝦碌,其他的都不再重要,畢竟時代唔同了!

23.07.2002 (Tue) 晴,間中有雨,大暑
今日一睇報紙頭條,有無攪錯,阿四個仔又炒車,今次又係因為想擺脫記者而開快車,結果天雨路滑而令佢部車打白鴿轉,祗係撞少少壆,都算幾好彩,經過咁多次意外之後,就算係被逼開快車都無理由成日有意外掛,由此可以證明呢D所謂靚跑車完全無安全感,另一方面亦證實阿四個仔技術完全唔掂檔(可能有人認為佢掂先唔會車毀人亡),但青蛙仔就認為佢應該要再教育,重新考牌,一方面可以保住佢條命,另一方面可以免佢繼續危害他人,大家覺得有無更好的方法?

26.07.2002 (Fri) 間中有雨,雷暴警告
方向報的頭條又再被阿四個仔霸住,真係唔明祗係未經證實的消息,但佢地話係可靠就可以上頭條,內容話阿四個仔會退出娛樂圈.......一年,同唱片公司合約會延長,又話會同阿菲遠赴他方結婚云云,呢D毫無驚喜的新聞都可以做頭條,莫非香港真係無野好報導?No news is good news!係又唔錯呀!

27.07.2002 (Sat) 陰, 間中有雨
睇報紙知道最近一年來民政事務局的調查發現,原來港人最急需改善的陋習是隨地拋垃圾及吐痰,其次是在非吸煙區內吸煙、無禮貌、上落交通公具時推撞人、同埋在公共地方大聲講電話, 青蛙仔覺得呢幾樣野簡直係香港人的死症, 就算而家話拋垃圾同吐痰會罰錢, 一樣大把人在上巴士前丟煙頭, 隨處可見有人放飛劍, 就算得三幾個人排隊都會打尖, 由上車講電話講到落車, 雖然青蛙仔都可算係自私的人, 但都唔會話做呢d野來影響到其他人, 到底公民教育要點樣推行先可以令到現今的下一代可以打破陃習呢? 頭痛!

29.07.2002 (Mon) 陰雨
今日放工之正煩惱今日過得好平淡, 青蛙日記又無野俾人睇了, 點知上到巴士睇見中文一分鐘, 又開得幾大聲, 青蛙仔好專注去睇, 學到一句成語, 希望大家可以分享一下, 就係【豕亥魚魯】, 青蛙仔讀得書少, 見到呢句野真係唔知乜東東, 雖然四個字都識讀, 但點解就真係唔知, 話說古時無影印機, 想話將書本分享就唯有用手抄形式, 但無可能百份百成本搬字過紙都無錯, 抄得幾次之後好多字都會由原來的字變成其他字, 例如豕字就會變成亥字, 魚字就變成魯字, 於是【豕亥魚魯】就係咁來的, 其實現實生活中都常有此類情形出現, 唔知事實真相就以訛傳訛, 令到本來件事完全歪曲了, 到後來真相大白, 傳錯者可能祗係以笑遮醜又或者當無件事, 非常討厭! 今次真係唔好對號入座, 青蛙仔唔係講你架, 祗係想講一個遊戲, 會唔會就係叫【以訛傳訛】呢? 抑或仲有另一個名?

30.07.2002 (Tue) 陰雨,出糧日
可能大家都知南韓係可以合法食狗肉的國家,無論男女都食得津津有味,本來道德上真係無問題,而且聖經都有記載,所有背脊向天的動物都係可以俾人類食用,但青蛙仔覺得貓狗係人類的好朋友,無論講到食左點樣企唔穩都好,真係入唔到口,而家報紙仲話韓國新推出港幣要成百幾蚊一盒的微波爐狗肉,係專為方便病人而設,仲好暢銷,真係極度頂佢唔順,唔想再講!

31.07.2002 (Wed) 陰雨,有雷
今朝報紙真係幾多野睇,大單的新聞反而唔及細新聞有趣,例如尋日又有阿婆俾拜神黨呃十幾萬,又要向呢班男女主角寫個服字,佢地眼光獨到,一睇就知阿婆有錢,仲要傾囊而出咁信佢地,真係好野。另一單係兩個【雙失】金毛仔,因為搵唔到野做而感懷身世(佢地可能無諗過自己咁樣衰係導致無人請的主因),其中一個的十七歲女友就陪埋佢地一齊燒炭尋死,可惜個女仔辛苦得滯而縮沙報警,事後三人齊齊獲救當無件事,又再嘻嘻哈哈,咁隨便將生命來玩的年輕人,到底佢地心裡面諗咩呢?有時會覺得呢種爛泥永遠都扶唔上壁,係唔係應該早點投過胎好過累人累物累自己呢?再另一單,生果報就做頭條大大隻字,方向報就祗係普通篇幅報導財爺親自發放的結婚通知,又一對祥哥祥嫂式的婚姻,愛情真係可以咁偉大咩?舊時代無咁開放、無咁多姿多采、無咁多誘惑、無讀咁多書就一定得,但係身處呢個年代,青蛙仔覺得真係好難,白頭到老?一方白頭之後要等廿年先輪到另一方白頭,可以等到嗎?無奈!

02.08.2002 (Fri) 陰雨、雷、間中晴
最近有兩兄弟開完兩場演唱會之後意氣風發,開口踩其他歌手夾口形,【醫神】同【黑人】雙雙都唔抵得要回應佢地,醫神就話樂壇已經咁差,唔應該再踩多腳,意味唔該佢地收聲, 而黑人就暗寸佢地出得台少,否則唔會講呢D野, 因為唱得幾好的歌手都會因為天時地利人和而選擇性地夾口形, 無錯, 青蛙仔都好同意兩位所講, 批評圈中人都係應該留番圈外人來講, 無謂自己人踩自己人, 青蛙仔係圈外人, 所以可以提出話佢地咪咀, 因為青蛙仔係消費者, 如果去睇演唱會而歌手係夾口形, 不如買CD聽, 而呢兩兄弟開演唱會青蛙仔就無去睇, 祗係感覺似好都好多人喜歡聽佢地, 但平心而論, 青蛙仔覺得佢地祗係 唱口水歌, 而首歌太好先俾人覺得佢地都唱得好, 但其實佢地歌藝未致於好得交關, 青蛙仔甚至大膽講, 佢地唱的和音根本 好多都係夾硬來, 完全唔和的, 即係話有出現唔夾的情況, 普通歌迷根本唔會聽得出, 祗係盲目跟人話好就好, 再者, 好多 時佢地翻唱歌都夾硬將音調提高, 吊起把聲來唱, 從聲樂角度來講, 根本唔入流, 如果咁樣學唱歌, 唔俾老師鏟先奇, 所以 希望兩位不如再努力一下, 唔好再嘩眾取寵了!

26.07.2002 No.132

06.07.2002 (Sat) 早上陰雨
有正面就梗有反面,尋日就有人在女人街的一幢大廈天台準備跳樓,消防同警方封鎖女人街,張開救生墊準備接人,佢就在天台邊緣游來游去,消防員疲於奔命,將氣墊移來移去,擾擾攘攘,攤檔東主就感到唔耐煩,叫佢唔好阻頭阻勢,攪到全世界開唔到檔,表面聽落好冷血, 佢地講得都有道理, 確實唔明點解D人死都要累街坊,好似跳地鐵、東堤燒炭等,全部都係好影響人,死得咁自私,唔抵可憐!

07.07.2002 (Sun) 陰雨, 公務員反對立法減薪大遊行
今日係公務員反對立法減薪大遊行的日子, 青蛙仔的OFFICE並無收到邀請, 可能因為無人加入工會, 所以大家都收唔到信, 但其實遊行係出於自願, 就算無人邀請都可以自行到場加入, 青蛙仔精神上非常支持, 但要同埋屋企人一齊上街就無咁諗過, 況且覺得肉在砧板上, 就算大 家點行動都一樣會減啦, 出來遊行祗係表達不滿的方式, 希望以後再有同類情形可以慎重考慮同埋尊重大家意見就好了!照新聞片睇, 各同事及家屬都行得非常有秩序, 非常平和, 加上警察部的全力支持開路及維持, 完全沒有混亂及意外, 比起個班數字行動的過激行為, 真係差得遠了, 記者沿途訪問店舖, 睇下佢地對封路有咩反應, 結果都係好壞參半, 有人支持公務員, 有人賣飲品就話生意好左, 有人賣其他野就話反對遊行, 仲話影響幾成生意, 青蛙仔心諗, 有無影響得咁多呀, 三幾個鐘真係咁好生意咩? 賴得就賴!

09.07.2002 (Tue) 晴
今日開始兩日假期的第一日, 朝早就去剪頭髮, 因為夏天的關係, 都算剪的幾短, 不過比起舊年去加拿大前剪到skin head咁又長DD, 髮型師開始提醒青蛙仔頭頂稀疏, 叫青蛙仔注意唔好俾頭皮太油同埋發炎, 否則就會有脫髮危機, 其實青蛙仔都知自己頭髮薄左, 呢種自然定律人 人都會有, 好難對抗, 唯有接受現實啦!

10.07.2002 (Wed) 晴, 今夜夕陽無限好
晚上收到電訊公司的電話推銷, 個女仔講野快到催命符咁, 問青蛙仔要唔要聽下佢講增值服務, 本來青蛙仔睇緊"無考不成冤家"唔想睬佢, 但都幫下佢忙聽一聽, 點知佢就係都要青蛙仔講資料, 青蛙仔就覺得你打得來就一早知啦, 係都要人講乜鬼, 於是就話, 既然唔講資料唔聽 得, 咁唔聽啦, 佢又唔想放棄個機會, 死死氣都要講咩四大增值服務, 又話頭三個月免費, 青蛙仔就同佢講, 唔使用免費來吸引, 原果唔需 要的話, 一世免費都無用, 佢講完第一樣之後, 青蛙仔已經知道係一向報紙都有賣廣告個幾種, 佢問青蛙仔係咪有好多垃圾電郵, 青蛙仔就 知佢想sell電郵過濾, 於是就唔係, 佢就好出奇, 因為已經阻截佢想介紹的服務, 當堂都講得慢下來, 青蛙仔就同佢講, 如果你報紙講個幾 樣就唔使講了, 全部睇過, 唔係咁有興趣, 但佢仍然係要好似機械式咁全部講出來, 理由係報紙個種係要俾錢, 而經佢申請就可以免三個月, 青蛙仔覺得好好笑, 但仍然無收佢線, 由得佢講完先拒絕佢, 本來鍥而不捨係幾好, 但都明知人唔要, 夾硬來都無用啦!

11.07.2002 (Thu) 晴
識得青蛙仔耐都會知道,青蛙仔的工作性質係要隔住塊玻璃面對市民,好多時因為大堂人多嘈吵,就算青蛙仔提高了聲線,總係有一半人係聽唔到,多數都報以一聲【0下?】,如果真係聽唔到,青蛙仔係唔會怪佢,但其實好多人係有慣性【0下】人的習慣,唔知大家有無呢種朋 友,青蛙仔就有好幾個呢類朋友,無論你講咩都好,就算佢聽到都會【0下】你,簡直【0下】到你煩,青蛙仔初頭唔知道就會重覆說話,但 熟左之後就唔會理佢,就算【0下】都唔會答佢,之後佢就會繼續講野,形成大家的對話會有好多【0下】同埋停頓時間,青蛙仔覺得呢種應 該係心理病,其實係有得醫,不過要佢忍住唔講【0下】,可能又真係幾難,但話時話,有時青蛙仔聽見對方講一些令人出奇驚震同埋係意料 之外、又或者係睇佢夠唔夠膽再講多一次的,都會【0下】人,相信呢種唔會係病掛?大家睇完之後,有無醒起自己原來成日都【0下】人 呢?

12.07.2002 (Fri) 陽光普照,酷熱警告
最近有周刊踢爆電視台的已婚當家小生同當家花旦祕密拍拖一年,令好多人都覺得出奇,青蛙仔一向覺得感情事係無不可能的,相識與分手都係緣份,就睇下係孽緣定係真正姻緣吧!兩個風馬牛不相及的人往往都可以擦出火花,實在令人摸不著頭腦,不過當人生經歷越來越多, 呢類事不停在你身邊重複又重複之時,感覺就會變得麻木,亦唔再覺得出奇,祗不過唔係當事人,永遠唔會理解到當事人的想法,都幾玄 妙,不過青蛙仔真係好服娛樂圈的人,如果係有名氣的,又講到點忙點忙,又有fans同狗仔隊跟住,仍然可以搭得上,唔知佢地拍拖方式係 點呢?去邊度先唔會俾人見到?抑或淨係暱藏在是但一個屋企牛衣對泣、死造爛造呢?天知!

15.07.2002 (Mon) 陽光普照
最近有隻百年老牌的蒸溜水轉了包裝,比起一般傳統膠樽突破得多,青蛙仔非常欣賞佢子彈型的包裝,而且仲係用青蛙仔喜歡的綠色,而且樽型好就手,更加有唔同大細,最細得二百幾毫升,適合埋小朋友,去做運動的朋友一支在手就更加有型,買一次之後就可以當水壺遁環再 用,都幾抵,雖然加礦的水好似有益D,但青蛙仔都係鍾意純蒸溜的顏色,寧願唔要礦了。

16.07.2002 (Tue) 陰雨
麥記在最近開始在夜市賣飯, 青蛙仔就未曾試過, 唔知及唔及得上KFC的磨菰飯或者雞皇飯, 不過以一間漢堡包連鎖店竟然賣飯, 確實係幾出奇, 但係又未致於上報紙同電視的港聞版掛, 唔好怪青蛙仔陰謀論, 總係覺得呢類報導有賣廣告成份, 唔係報紙又點會咁詳細講解D飯用咩米 來整, 烹調方法又點點點, 根本就係一篇廣告, 不過無論點都好啦, 有機會都會試一試的, 起碼青蛙仔對麥記印象好好, 食物亦好乾淨, 無 選擇之下食麥記就最好!

18.07.2002 (Thu) 晴
近期越來越多娛樂圈中人上港聞版頭條,當然全部都唔慌係好野先會上港聞版,B哥哥申請破產的消息傳出之後,傳媒又再疲於奔命,B哥哥覺得自己祗係金錢破產,並非人格破產,所以無必要逃避,勇敢面對傳媒,唔使佢地偷拍咁煩,其實B哥哥在樂壇超過三十年,曾經亦有唔少 風光日子,祗係不善理財,以致如此田地,後生一輩的年青人就更加對佢無興趣,實在令青蛙仔有點惋惜,證明藝人的風光背後,總會有不 為人道的辛酸,紅藝人的收入,比起一般人多幾十倍甚至幾百倍,如果唔係大花筒硬要過奢華生活的話,根本可以活得非常開心,人心無厭 足,換來祗有無限唏噓!

12.07.2002 No.131

21.06.2002 (Fri) 晴,巴西對英格蘭,夏至
今日係夏至,唔單止夏至狗無地走,相信連人都熱到紮紮跳,不過認識青蛙仔都知青蛙仔唔怕熱,好少出汗,係做家務先可以令青蛙仔出成身汗,所以就算三十幾度對青蛙仔都唔係好大影響,反而好鍾意陽光燦爛的夏日。

相信今日好多球迷都緊張異常,要睇英巴的世紀大戰,青蛙日記出街之時大家都知道賽果係巴西贏左二比一,大家服唔服,有無野好講?

26.06.2002 (Wed) 晴,酷熱警告
青蛙仔識得班K友好認真,係為唱K而唱K,所以唱K都有守則,大家又睇下認唔認同:
1.首先唔會約太多人,三至五個就夠,以免輪候時間太長;
2.點歌要有次序,每人輪流點一首,不得搶住遙控猛點;
3.要尊重歌手,除非點歌者邀請,否則不得搶咪或高聲合唱騷擾歌手;
4.歌手唱歌時,別人可以傾談,但不得喧嘩大笑影響歌手;
5.邀請他人合唱歌,當自己唱一首計算;
6.遇有歌曲壞死或未能及時播放的情形,可以後補插播一首;
7.去廁所及打電話而miss歌的話就當過秒不能後補;
8.提早離場的要主動識做俾錢,有多無少,費事第日追收,
大家會唔會覺得太苛刻?青蛙仔覺得喜歡唱歌而去K練歌,大家公平一點就無可厚非,如果成班人去玩就梗係唔可以咁啦,不過有時自己點左首歌俾人仲唱得大聲過自己來跟住唱又真係不是味兒,辛辛苦苦搵到首偏門歌又俾人話好聽要一齊唱,又不是味兒,所以寧願一人唱一段,到副歌再合唱都仲可接受,大家鬥大聲來唱,座上客都唔舒服啦!

28.06.2002 (Fri) 晴,間中有雨,連續第五日酷熱警告
今晚睇【白夜追兇】(INSOMNIA)(返到屋企查完字典哦一聲, 原來咁解! 點解? 好學D, 自己查先深刻!), 套戲唔算太花巧懸疑, 因為人物唔算太多, 兩大老戲骨, 阿爾柏先奴同羅賓威廉斯大鬥法, 阿爾由頭帶到尾, 青蛙仔略嫌羅賓出得唔夠多, 不過佢地演技真係好好, 在阿拉斯加的小鎮完成拍攝, 場地景點好靚好寧靜, 仲希個小驚喜, 其中一個女配角竟然係ER的其中位醫生, 不過青蛙仔唔記得佢叫咩名了, 套戲係講及一位老差骨偵查兇殺案時反被殺人者捉住痛腳, 走入不歸路, 片中說教味都幾重, 良心對唔住人, 要一個大話蓋另一個大話, 攪到自己INSOMNIA, 到最後連正義的女主角都幾乎係咁, 最後被男主角叫佢唔好走歪路, 先臨崖勒馬, 義意深長!

29.06.2002 (Sat) 陽光燦爛
今朝睇見任總同財爺向市民展示九月發行的新十蚊紙,青蛙仔覺得最大轉變唔係話由銀行發鈔改由政府負責,而係由綠色變為紫色,幾十年來【青蟹】的叫法終於都完結,以後唔知會用咩來形容十蚊紙呢?今次再度發行十蚊紙,大家都心中有數,係通縮的表現,不過呢樣似乎都唔重要,因為大家都慣左通縮呢樣野,反而第一時間會諗起未來的農曆新年,封利是的朋友會輕鬆好多,而接利是的小朋友就無咁開心了,錢幣店又會唔會大量收藏呢種【紫河車】呢?又成舊成舊咁收埋,等若干年後先放番出來? 講真青蛙仔唔係咁鍾意做呢門生意的人,樣樣野都俾佢地走後門收埋收埋,然後就賺取真係為興趣的收藏fans的金錢,有時見到佢地炒(火農)野,郵票變廢票,跌破底價都無人吼之時,青蛙仔都會覺得好心涼,抵佢地死,哈!

30.06.2002 (Sun) 陽光燦爛
食早餐當午餐時, 打開份報紙一睇, 有無攪錯呀, 又撞車? 阿四個仔真係令人搖頭, 雖然青蛙仔唔知佢今次意外係因咩事, 但以佢的前科來推斷, 應該又係佢錯啦, 成部旅行車隊落部平治屁股, 撞到鋼水鬼咁重的平治都變型, 可想而知開得有幾快, 見過鬼仍然唔怕黑, 真係爭佢唔落, 今次傷者仲要係律師, 恐怕唔告佢都誓不為人啦, 睇怕佢官司一單接一單, 仲密過佢安排的工作, 真係有排煩了!

03.07.2002 (Wed) 晴,酷熱警告
今朝睇電視見到有貨機撞客機,死幾十人的新聞,真係幾出奇,個天空咁大都可以迎頭相撞,青蛙仔對航空交通無認識,所以唔知道兩位機師係唔係都覺得條航線最安全,所以就點都唔讓路,青蛙仔亦唔知道飛機係唔係唔可以好似汽車咁容易駛開,因為好多時睇戲都有千鈞一髮之時主角會及時避開撞山之劫,雖然現實中的飛機速度係好快,但真係無理由咁都會發生,除左歎一句【該死唔使病】之外,你話仲可以有 咩好講?

最近老麥推出懷舊價,三蚊有個傳統漢堡包,可能對某些人來講,再平D都無興趣,因為漢堡包唔及得上其他包好食, 但漢堡包真係陪住青蛙仔成長,廿幾年來到今時今日仲係賣三蚊,用十幾蚊可以食到飽到上心口,都算唔錯啦,其實好多人都唔鍾意食漢堡包內塊酸瓜,青蛙仔反而覺得得一片太少,因為酸瓜好開胃, 唔知大家去老麥會唔會食傳統的漢堡包呢?唔食又有咩選擇?

05.07.2002 (Fri) 晴,酷熱警告
放工在巴士站等巴士, 見一年青人拉低頂帽, 唔俾人見樣在派傳單, 青蛙仔閒來無事拎左張, 見到張紙係地產宣傳, 底面都有字, 順手放了在垃圾桶(大家唔好學, 因為應該放在藍廢紙膠桶), 等左一陣巴士仲未來, 見個年青人好似無乜人幫襯, 但仍積極地向途人伸手, 於是青蛙仔同佢講:"俾多張我啦!", 個年青人竟然抬起頭來, 好感激的同青蛙仔講:"唔該你呀!", 其實祗係無聊先會咁做, 對方竟然咁大反應, 青蛙仔覺得有點慚愧, 微笑一下就轉身, 今次俾面佢, 無立刻放入垃圾桶, 仲帶埋上車, 其實青蛙仔平時都唔一定會接傳單, 尤其在旺角, 十步就有人派一派, 點拎得咁多, 不過如果見到係派紙巾的話就會主動去拎, 原因又唔係貪心要包紙巾, 因為而家日日買報紙都有紙巾, 用極都用唔完, 但老爸係有收集紙巾的習慣, 儲埋唔同種類的免費紙巾幾十包, 內裡都有唔同的廣告, 都幾得意, 所以青蛙仔遇上派紙巾的人, 都會拎一包俾老爸, 佢就會珍而重之收起佢, 唔知大家在街上會唔會幫下人手拎番張傳單呢?

28.06.2002 No.130

08.06.2002 (Sat) 好好天, 中國對巴西!
今朝開工前幾位制服同事談論的話題係尋晚場波,又話碧咸打得差,轉頭又話唔信【阿四個仔】受傷,必定事有蹺蹊,之後又扯埋佢個新女友,又話佢阿媽嫁幾勻都咁風光,四十幾歲都著低V露心口紋身的婚紗,成個 雞樣,提起雞又再講圈中邊個做雞,青蛙仔聽到覺得好好笑,當然唔會搭咀,但總係覺得佢地唔係街市佬賣 菜婆都講得咁著躍,講呢D話題的心態可能係出於【唔抵得】,因為好多人見人風光見人威而自己及唔上就會 唔抵得,有機會就會踩下人,所以佢地唔抵得碧咸萬人迷、唔抵得阿四個仔咁多記者影、唔抵得人地嫁幾次 都仲嫁得出,更加唔抵得人地做雞可以成千萬咁搵番來,其實笑貧不笑娼,如果人地唔係犯到你,做一個性 工作者又如何?干卿底事?

09.06.2002 (Sun) 下雨天
形象健康正氣的歌手阿康, 竟然在台灣涉嫌藏有軟性毒品而被拘捕, 可能令好多人跌眼鏡, 佢結婚唔太耐, 被捕時竟然有另一個女人相陪, 黃賭毒揩了兩範, 唔知有無人會望佢有事呢? 其實青蛙仔覺得佢今次的罪行 似乎嚴重過阿四個仔, 但佢形象一向唔差, 所以唔會有人落井下石, 仲可能希望佢無事, 又或者覺得佢一時 貪玩先會咁, 真係唔公平!

11.06.2002 (Tue) 陰雨,早上黃雨及雷暴警告
尋日係垃圾蟲定額罰款的正式執行日,八大部門齊齊攜手執法,不過第一日就已經有暴力反抗事件,班惡爺見你唔係差人就睬你有味,死都唔拎身份證出來,仲郁手打人,真係利物浦,犯左事完全唔當有皇法,拉到 佢應該判坐監兼打番佢十籐八籐,不過講真丫,如果班執法者見到成班金毛隨地掉煙頭、吐痰同掉汽水罐的 話,佢地會掉頭走當睇唔到定係拚死無大害咁去票控佢地呢?法律永遠都幫有錢人同惡爺,香港人同中國人 想好?條路仲好遠!

相信大家都有機會聽過黑人唱的世界盃歌,青蛙仔自己就覺得首歌無四年前咁入屋入耳,【球迷奇遇記】唔 算係首好歌,但起碼有應有的流行元素,開頭幾句國語的【起來、起來】可以令三歲小朋友都唱到,而且好 有東方的進行曲味,好適合香港大眾,但今屆呢首歌比較深,雖然節奏強勁,但好似加入左拉丁同西班牙的 襯托,歌詞唱得太快太密,無時間俾人聽入耳,加上今年無轉播權,所以好難大播特播,但其實黑人都好盡 力,搵佢唱直頭有說服力過里昂多多聲啦,不過香港人就係咁,鍾意就一窩蜂,唔鍾意的話,送叉燒飯都祗 會食曬你碗叉燒然後就唔理你到底賣咩!

13.06.2002 (Thu) 晴
阿康有驗尿的初步結果,對藥物呈陽性反應一點都不意外,因為佢早有一著,開定記招話平時自己有食減肥藥,所以阿康的fans可以唔使擔心住,但青蛙仔真係唔明既然都驗到有食過藥,就快快趣驗埋食過咩藥啦,一係就等齊先公佈,係要講D唔講D,好似要吊人癮咁,今晚新聞已經證實驗出佢有食過搖頭丸的成份,佢就需要返去要受審,仲可能要服刑同被逼戒毒,如果係你,你會鼓起勇氣去服刑,幾個月後又一條好漢,定係寧願放棄台灣市場,在奈佢唔何之下,廿年內誓死唔再去台灣,當無件事都無問題,不過呢樣野又係早前提過的金錢與自由的問題,寧願失去自由幾個月,之後可以繼續搵台灣人的錢,定係不自由毋寧死呢? 唉, 律師即係律師, 仲要死撐話佢可能係誤服, 真係服得佢好緊要!

16.06.2002 (Sun) 陰晴不定的父親節!
今日係父親節, 祝天下各位父親, 或者係母兼父職的人士父親節快樂, 青蛙仔識唔少朋友的家庭未必咁融洽, 對父親的感覺可能唔係太大, 希望咁樣並唔影響佢日後做父親的心態, 希望佢地將來都會係個好爸爸!

娛樂版報導劉德華早前為左演出慈善show而傷了塊面, 已經個幾兩個月, 傷痕仍清楚可以見到, 劉華就解釋話早前因為拍戲要暴曬, 所以疤痕仍然未褪, 其實青蛙仔認為最主要關鍵佢係無講到, 相信大家都知佢經己過左四十歲, 身體的新陳代謝唔可以再同十八廿二的後生仔比, 後生仔整親手腳, 可能一陣間就無事, 但一個中年人, 真係唔可以要求佢可以好得咁快, 呢樣野青蛙仔深深體會得到, 無論個樣點呃到人都好, 身體的皮膚唔可能全身都搽祕密鎖匙II, 頸部同對手就好似年輪一樣, 絕對唔暪得到人, 睇來佢面上的疤痕又深又多, 有排都唔褪了!

20.06.2002 (Thu) 早上雷暴警告,但天水圍陽光普照
有床褥公司請大學向專業人士做調查,原來有九成幾人都睡眠不足,青蛙仔覺得佢份調查都唔一定俾專業人士用,大家又一齊睇下自己夠唔夠訓丫,括號內係青蛙仔的答案:
1. 你經常需要在周末早上多睡數小時。(有就好了,個個周末都要返工!)
2. 你經常要用鬧鐘或者要人叫先識起身。(青蛙仔通常會在鬧鐘響前醒!)
3. 你有時在駕車時想訓。(唔識開車,但肯定坐車會訓!)
4. 你經常睇電視會訓著。(好少坐定睇電視,但睇悶的VCD就肯定會訓!)
5. 你早上會掙扎一段時間先起身。(咁又無!)
6. 你經常在沉悶會議或講座中無意間睡著。(青蛙仔無會開,但如果真係沉悶,一定唔會無意,係有意訓著)
7. 食飽之後稍作休息會不經意睡著!(一定會啦) 以上七點出現一個或以上就代表睡眠不足,唔怪得有九成幾人啦,真係好想知有邊個係一項都唔中的人呢!

14.06.2002 No.129

27.05.2002 (Mon) 陽光普照
娛樂版報導【彭姑】會演舞台劇,扮演一代歌后鄧麗君小姐,但係唔知佢為左搏記者報導定係咩原因,竟然話從來都無聽過鄧小姐的歌,仲話最近先狂聽鄧小姐的歌,確實好好聽,仲成為佢歌迷云云,本來青蛙仔對 【彭姑】印象唔差,雖然佢個樣好唔掂檔,但都算有幾首好歌,但今次真係頂佢唔順,請問彭姑貴庚呀?幾 廿歲人竟然話未聽過鄧小姐的歌,就算佢扮曬受外國教育都好,全球有華人的地方就有鄧小姐的歌聲,況且 佢都返左來香港起碼十年啦,香港的十零歲小朋友未聽過鄧小姐的歌唔奇,但係你彭姑未聽過就真係匪夷所 思,青蛙仔不得不贈你【無知】兩個字,希望你可以好好檢討一下。

29.05.2002 (Wed) 陽光普照
今早睇報紙話女高官葉太都老貓燒鬚(呢四個字唔代表話葉太老),因為佢成日幫襯街頭的聾啞人士買毛公 仔,甚至一百蚊買一隻都試過,但最近聾人協進會聯同幾個聾人團體都發表聲明,佢地係唔會咁賣毛公仔, 甚至籌款,所以葉太都懷疑係受騙了;其實相信大家都一定遇過呢班人,都唔知裝聾定扮啞,總之就死纏爛 打,唔知情而貪小便宜的人見到有野遞埋來,隨手就會接住,點知佢就會追住你俾錢,你想唔要佢又唔接, 怕麻煩的人就會就範而俾錢,唔好脾氣的就會將個公仔丟在地上,佢地先肯收手,通常青蛙仔遠遠見到呢班 人都會裝定一個不要惹我的表情,所以多數都唔會俾佢地煩,而妙齡女士、西裝友同師奶(葉太個種?)多數 都會係佢地對像,因為佢地會怕唔好意思而奉上金錢,大家遇到呢班騙子又點應付呢?

03.06.2002 (Mon) 晴
今日報紙的花邊港聞報導,尋日某球場有悼念六四的活動,邀請【秋天出生】的香港影帝來表演,可能歌曲裡面有部份係不雅粗口,有觀眾覺得球場有大有細,唔應該唱呢D歌,於是就報警,但差人到場了解之前,影 帝己經演唱完離開了,事後記者問番影帝,佢好勞氣咁話講粗口唔係犯法,旺角都大把人講粗口,係唔係要 拉曬,又話差人接報到場係戇居云云,其實青蛙仔一向唔討厭佢,仲覺得佢演技真係好好,不過今次佢的言 論令青蛙仔覺得佢幾無知,請佢唔好咁大聲話講粗口唔係犯法,其實如果在公眾場所講粗口令到其他人覺得 不安的話,已經觸犯法例,而且仲有唔少成功告得入的例子,所以以後請佢講粗口都咪講得咁高興,如果唔 係就可能會惹官非,至於佢話差人戇居,青蛙仔覺得佢都一樣咁戇居,因為警方係唔會容許有狼來了的事件 出現,所以無論一日有幾多人捉弄警方而報假案都好,但凡有人報案,就算明知係假,警方就點都要搵人到 場了解,咁樣先可以保障到市民的安全,其實佢都讀好多書,個人脾氣火爆都唔代表佢要下下都似潑婦無理 亂鬧來嘩眾取寵,個人的內涵與修為,真係一門高深學問!

04.06.2002 (Tue) 晴,十三年了
十三年了,有人會刻骨銘心、有人會印象模糊、有人當係歷史、有人唔知咩事,更有人唔當係一回事,證明時間真係最厲害及最永恆的武器,青蛙仔會係當歷史睇的人,件事同秦始皇焚書坑儒都差唔多,青蛙仔讀文 科,但歷史科考得好差,永遠都唔會牢牢記住,令校長同老師都跌眼鏡,因為明明見青蛙仔好留心聽書,但 又考得差,哈,其實青蛙仔練就入定神功,元神雲遊太虛,待落堂鐘響先會歸位,忽然拉得太遠,速速扯返 來講下今年的感受,青蛙仔近年都會以Sally的【自強不息】向年青一代共勉,去年中國的表現已有大躍進, 成功加入世貿、爭取2008奧運,甚至今日的世界盃足球賽,都足以令年青人以自己係中國人為榮,至於其他 尚未解決的問題,就待時間去解決吧,總之大家都向前看,記住要【自強不息】,將來一定會更美好的。

06.06.2002 (Thu) 早上雨, 下午陽光普照
報紙話嶺大校長高調批評校內學生英文水準低到連26個英文字母都數唔掂,連自己個名都讀唔正,陳校長仲辣埋港大生,話佢地一樣都係咁,呢番言可能引起好大迴響,好多人會覺得佢誇張,但青蛙仔又覺得事實真 係好多年青人數唔到英文字母,當然唔係話由A開始數起至Z啦,即係抽樣問K之後係咩,R之前係咩,佢地就 未必即時答到,如果要佢由Z倒番轉數到A就更加困難;呢樣野係由細到大的概念根深蒂固,好少有先生抽樣問小朋友,由尾唸起就更加驚佢地學壞師,連彩虹七色都要限住係【紅橙黃綠青藍紫】,不過青蛙仔就偏偏鍾意彩虹七色係【紫藍青綠黃橙紅】,根本無分別,其實排次序呢樣野同本身IQ都有關係,要睇少少天份,不過後天訓練就點都會有幫助,例如成日查字典的話,數英文字母應該會快好多!

07.06.2002 (Fri) 晴
【阿四個仔】終於都被正式起訴,尋日兩父子一齊到廉記報到,有大批記者在等住影相,兩父子表現大方,企定任影一輪先上車走,既成事實都無必要閃閃縮縮,好過俾人影醜態,本來今日應該好多人要睇佢點死, 點知峰迴路轉, 因為太多人造成混亂, 混亂之中佢俾記者的相機整親, 又俾佢可以拖延時間, 睇來大家又要等下了!

31.05.2002 No.128

11.05.2002 (Sat) 凌晨黃雨,日間天晴
娛樂版報導城城話佢媽媽終於肯無條件放棄間公屋,讓俾有需要的人士,確實香港真係有好多人環境變好之後仲霸住間公屋,例如仔女好似城城咁叻,但自己仍然唔捨得舊街坊及環境,就算俾間新屋幾大幾靚都好, 所謂龍床不及狗竇,加上又平租,所以遲遲唔肯搬,城媽媽考慮左兩年先搬出,其實都阻左真係有需要的家 庭兩年,但都好過唔搬;還記得清蛙仔比較好彩,十幾年前公務員有配額可以申請公屋(而家好似無了),當 時青蛙仔年資好短,人人都話青蛙仔有排輪,點知又唔係咁,因為青蛙仔接受了當時地方算係偏遠的上水雞 嶺,所以祗係兩三年左右已經可以上樓,住左八年再抽埋而家間居屋,所以青蛙仔覺得政府都算對得自己算 唔錯了。

12.05.2002 (Sun) 陰, 間中有大雨, 母親節
睇娛樂版知道F4成員言承旭來港舉行打手印會, 直頭萬人空巷, 相信全港的FANS都傾巢而出去等佢, 真係神奇, 靚仔真係著數, FANS訓街排隊超過十日, 你話陪老豆老母去飲茶有無咁神心又另一回事, 總之見到偶像 一面, 俾佢打個印握下手就開心到訓唔著, 而呢位年青偶像的主辦都算有人情味, 唔會扮大排, 居然來者不 拒, 祗要你肯來的話, 一定幫你蓋印, 印足九粒鐘, 就算訂曬機票都要達成fans心願, 延遲到今日先走, 呢 種態度先討人歡心, 可惜佢係過江龍, 如果香港的偶像可以學下人地, 多些親切的話, fans又點會咁易移情 別戀丫!

13.05.2002 (Mon) 早上陰, 下午晴
睇報紙訪問某公務員,現職食環,月入萬零蚊,佢話一家四口,自己係家庭支柱,真係唔希望減薪,睇到呢度本來都好正常,個個都係咁捱啦,點知睇落原來話仲欠幾萬銀咭數,所以生活艱難云云,呢樣野真係幫唔 落,邊個叫你欠咭數先?一家四口有萬幾蚊收入,相信已經好過好多人,欠咭數可能係佢個人問題,但又入 埋政府數,真係好無道理,青蛙仔覺得呢種慣性拖咭數的人,就算今日幫佢還清,聽日一樣會再爭過,青蛙 仔見唔少呢類人,甚至有親人都係咁,如果唔影響到其他人就話知佢爭幾多都好,否則就極度討厭!

20.05.2002 (Mon) 陰,雨,佛誕補假
今日睇報紙又有人自殺,不過呢位廿歲的年青人都幾得意,在ICQ識左個十二歲女仔,之後雙雙墮入愛河,但最近個女仔提出分手,男仔箍煲唔成功,結果要食安眠藥自殺,估唔到風水輪流轉, 唔係個男仔拋棄個小妹 妹, 竟然係小妹妹拋棄佢, 仲要尋死, 真係唔死都無用!

21.05.2002 (Tue) 陰
方向報報導中大醫學院最近有個電話訪問,原來香港可能有十二萬人患上驚恐症,症狀係心跳極快、呼吸困難、作嘔作悶、害怕不能控制自己、標冷汗、身體發抖、心口唔舒服、驚自己會暈、死及黐線、有麻痺或針 拮感覺,而定義係過去一個月都有最少一次出現三項或以上特徵,就算情況消失都擔心會再出現,令當事人 困擾甚至影響工作、家庭同社交,有人甚至去人多地方都好唔舒服,連搭地鐵都會驚恐,超級市場都唔入, 幾個月都唔敢出街,真係幾誇張,雖然青蛙仔未致於係咁,但有時真係會出現多種上述症狀,已經屬於十二 萬的其中一份子,而且相信唔係咁易醫,唔知大家又會唔會咁唔好彩,又係其中一份子呢?

22.05.2002 (Wed) 陰, 晚上大雨
近日在網上有個頂包遊戲,大家就算無玩過都會開來睇過,係講及【阿四個仔】最終要受牢獄之苦,青蛙仔都開來睇過,覺得無甚特別,唔知點解傳媒又會咁遲先發現,成幾個星期咁耐先走去訪問【阿四個仔】身邊 的人,可能近來真係少左好似【醫神】的鎯鎯事件,於是就想挑釁一下,講真【阿四個仔】平時係就係好 吋,而且負面新聞多多,不過佢今次犯的錯都唔算傷天害理,如果係撞死人搵人頂包就衰好多,今次祗係撞 爛自己部車,一時驚起上來先會咁,分分鐘都未必係佢自己主意,但就全世界人都要睇住佢死為止,最慘就 係網上的散播,大把人收到新野都會慌死蝕底,尤其係網上謠言,第一時間就傳俾佢個list上所有人,青蛙 仔就唔會咁做,仲會叫對方下次諗清楚先好傳出去,始終覺得如果網上世界可以再乾淨點、唔再傳謠言、無 人製造病毒去玩人,改為傳送有用資訊同研究有建設性的程式,相信資訊科技會進步得更快。

唔係報紙講都唔知,原來而家康文署將部份壁球場改成桌球室,價錢貴過一般桌球室,但設備同氣氛又無桌 球室咁好,唯一好處可能係無咁雜,所以使用率奇低,無人幫襯,青蛙仔覺得康文署又真係抵俾人話,有心 推廣桌球運動就做得好D啦,攪到唔湯唔水,好似求求其咁,班後生仔真係睬佢都有味,希望而家俾傳媒唱一 唱之後會有所改善,吾好再浪費公帑啦!

24.05.2002 (Thu) 開始好天了
報紙報導清談節目名主持在佢節目內炮轟香港機場, 話佢接佢老母由外地返港, 因為行動唔便, 想話搵部輪椅, 搵勻全個機場都無一部, 有損香港云云, 青蛙仔真係覺得好奇怪, 因為青蛙仔有朋友在機場就係做呢樣 野, 祗要有人開聲有需要, 佢地就會幫手推輪椅去幫D乘客, 而青蛙仔亦坐過飛機, 親自目睹機場不知幾多輪 椅, 亦睇見有足夠人手去推有需要人士, 機管局亦同青蛙仔有差唔多的解釋, 就係唔明點解呢位主持會咁樣 講, 唔通因為佢問人的態度有問題, 以為自己係名人, 一定要人招呼佢, 所以先得到如此"厚待"? 因為見唔 到輪椅的機會真係好微, 真係唔明!

17.05.2002 No.127

29.04.2002 (Mon) 晴
今日遇到好幾個唔識字,連自己個名都寫唔到的人,其實青蛙仔唔會岐視或者睇唔起佢地,但佢地態度實在有問題,唔識字唔緊要,但就唔可以當人應份幫佢咁,禮貌係家教,無讀過書的人都可以有禮貌,睇到有D根 本年紀唔算大,係都要話唔識字,連自己個名都唔肯填,仲要好理直氣壯,呢種人先令人討厭,現今社會, 文字咁重要,又唔係七老八十手震震,學都唔學下,仲要老奉聲大大,簡直討厭無倫!

最近有個廣告好攪笑,青蛙仔好多時都係在房隱約聽到首歌,唔知唱咩【字花、字花】咁,但又次次都無為 意佢賣咩產品,後來又再聽多D個廣告的slogan係【直到天長地久】,心諗又係手錶?後來先知係賣【負離子 洗髮露】,【字花】原來係【直髮】的普通話,呢個時候先覺得句slogan好正,用左就可以直髮直到天長地 久,真係好掂,但青蛙仔到而家都未攪清,到底隻洗頭水叫咩名?

30.04.2002 (Tue) 陽光普照
今日坐巴士見到兩個平時成日見的學生哥,兩個條褲腳都放到盡無縫番,證明佢地發育增高左,忽然覺得好似回到以前六至八十年代咁,普通人家讀書的小朋友到發育時期,都會因為條褲唔夠長而放褲腳,不過青蛙 仔卻相反,因為求學時期永遠係全班最矮,買褲通常都要改短,而且老爸好錫仔女,儀容好重要,就算家境 唔係咁好都唔容許有放褲腳呢樣野,甚至執阿哥舊衫都好少,所有衫褲鞋襪,全部都係合身的,諗番都覺得 當時好幸福,到今時今日著合身的衣服就代表與時代脫節,年青人唔係著窄到唔可以深呼吸的衫,就係著鬆 到放兩個人的板仔、Hip Hop衫褲,青蛙仔就認為,恤衫西褲係好永恆,都幾鍾意著,可惜近兩年返工真係無 機會著西裝,求求其其又一日了!

03.05.2002 (Fri) 陽光普照
睇娛樂版知道郎雄先生逝世的消息,青蛙仔覺得意外與惋惜,呢位老牌台灣影帝,與李安導演合作的【推 手】、【喜宴】及【飲食男女】,部部都非常出色,青蛙仔記得睇完【臥虎藏龍】之後講過,郎先生演得非 常稱職,可惜無時間發揮,有點浪費,後來聽聞有套戲叫【刮紗】,個故事好吸引,亦好似係佢同梁家輝主 演的,不過香港仲未上影,青蛙仔好想睇, 之後楊紫瓊亦邀請佢拍荷里荷的新片,睇劇照已覺得佢老左好 多,原來已經帶病在身,估唔到電影尚未上演就成為最後遺作,相信【天脈傳奇】呢部戲在來年的電影頒獎 禮一定會向佢致敬,青蛙仔都好想睇呢部戲,各位喜歡睇電影的朋友,如果你仲未睇過郎先生的戲,有機會 一定要睇VCD,一定唔會令你失望。

06.05.2002 (Mon) 陰晴不定,立夏
最近屋企樓下新建設了張乒乓波檯,青蛙仔每次經過都會見到唔少青少年在打波,證明呢類免費設施係好受歡迎,其實青蛙仔在求學時最喜好的運動就係打乒乓波,因為自己體質差,足球籃球呢類活動根本唔夠人 爭,唯有係乒乓波先有得同同學揮下,青蛙仔都唔算打得太差,不過【工欲善其事,必先利其器】,有時都 幾唔抵得屋企有錢的同學,因為可以買塊貴價球拍來彌補技術不足,當時青蛙仔用塊幾蚊雞的【流星牌】正 膠粒球拍,都已經打得不知幾開心,後來用【紅雙囍】反膠粒,心理上覺得功力大增,跟住儲好耐錢買左塊 廿幾蚊,亦係【蝴蝶牌】之中最平的,已經可以威一陣子了,至於有錢同學成日換新拍,仲要係一百幾十一 塊,真係遙不可及的!

08.05.2002 (Wed) 晴
娛樂版報導【大牙肉】話佢讀書時好鍾意林文龍,記者就問佢有無收藏阿林生D相片,點知【大牙肉】竟然話梗係唔會浪費呢D錢,仲話唔會咁無理智,青蛙仔覺得佢講呢D野好衰格,佢自己都有唔少歌迷會買佢肖像的 產品、甚至貴價謢膚品,即係一樣咁無理智啦,唔知點解班年青偶像講野總係唔經大腦,買張相來收藏都話 無理智,唔知用一千幾百去睇佢演唱會又叫咩呢?青蛙仔真係好服當年的譚校長同成龍大哥,佢地永遠唔會 講D令fans唔舒服的說話,甚至一大塊豬扒撻埋來錫佢攬佢都仲係笑面迎人同佢地合照,邊有而家咁吋,影多 張相同簽多個名都驚死人拎去賣,時代真係唔同了!

尋日又有虐兒案發生,遍體麟傷的八歲女因受虐而離家出走,被警察追問而揭發遭母親毒打,記者訪問父親 時,父親仲係講唔打點教得好,其實某程度上青蛙仔係幾同意,有時頑劣的細蚊仔真係出爐鐵,唔打唔得, 少少皮肉之苦可以令佢有所警戒係無可厚非,但又唔代表係唔係都要毒打一餐,咁樣反而影響小朋友心智, 青蛙仔有鄰居成日打女,大人的粗口聲連同小朋友凄厲的慘叫聲,聽到都令人心寒,其實青蛙仔好想舉報, 但又唔知確實係邊個單位,逐間搵得來都可能打完,報得警來都完全唔係個回事了,想多管閒事都有心無 力!

03.05.2002 No.126

07.04.2002 (Sun) 極好天
今日去睇【異度空間】估唔到有咁好的水準,林嘉欣有非常突出的表現,配合埋化妝,真係令人覺得佢好似撞鬼,賴士尼扮比自己年輕的角色都算稱職,但後來演被驚嚇的表情就好有老態,不過兩個憑空去表達撞鬼的表情實在唔易,值得一讚,而片中的音響都好認真,失驚無神會嚇你一驚,用門聲來代表鬼的動作亦係一絕,另外徐大俠徐少強大改戲路,雖然出得唔多,但又真係做得好好,其實劇本真係寫得幾好,但偏偏衰在收尾十分鐘,係都要隻鬼現身出來,太真實的話,大家又反而唔驚了,加上香港特技化妝好極有限,令結局唔夠完 尾,話雖如此,港產片有呢種成績,係值得高興,青蛙仔敢講呢部片好過所有【凶鈴】、【陰陽路】、【龍 婆】同【七月十四】系列的電影,值得一睇!

09.04.2002 (Tue) 晴, 農曆二月廿七日
尋日地鐵有故障,大批市民(好似話有十萬咁誇張)受影響,當然會有人鼓躁亦有人逼暈,青蛙仔覺得地鐵都唔想有故障,其實佢地都會有人晚晚通宵維修保養,但意外意外,即係意料之外,久唔久先一次故障,如果 唔係有人命傷亡,都係無可厚非值得體諒的,不過香港人的時間懶係寶貴,總之佢俾左錢買飛你就唔好阻遲 佢,否則就會嘈嘈閉,青蛙仔睇到記者拍攝的圖片都幾好笑,成村人企在入閘機前面等待,直頭好似跑馬拉 松等開步咁,可惜又無影到攪掂之後搶入閘的情況,應該仲好笑。

10.04.2002 (Wed) 陰雨
兩間電台的女主持阿car同阿cha又出來罵戰,事緣係阿car請到台灣【偷拍性愛光碟】的女主角做訪問,阿 cha吃不到葡萄,話唔應該鼓吹歪理,唔值得訪問該名女子,阿car就踢爆佢搵唔到人做訪問先會咁講,青蛙 仔覺得兩個七加一都唔抵幫,無錯阿cha好有道理,公家電台根本唔雖要請呢個女人來嘩眾取寵,不過阿car 作風一向係咁,人緣懶係拍得住黃夏蕙,個個都話係朋友,其實如果唔係靠老公同電台勢力,人地真係睬佢 都傻,話雖如此,阿cha根本唔抵爭,青蛙仔就真係唔信佢咁正義,以佢平時鍾意揭人底牌、語不驚人誓不休 的作風,點會放過呢個機會丫,可能真係別有內情唔可以搵人訪問,但又唔抵得人地先會咁講野,青蛙仔都 幾想睇佢地鬧大d,等佢地求仁得仁出下鋒頭,試下俾記者追問的滋味,不過佢地既非紅人亦非偶像,睇怕要 打到扯甩頭髮先會有其他人想睇都唔定。

11.04.2002 (Thu) 陰, 氣溫稍降
行過報攤見到本雜誌封面, 影到陳浩民同李蕙敏行街, 仲話揭佢地姊弟戀, 青蛙仔覺得好好笑, 記得李蕙敏同區海倫出道組成ECHO之時, 李蕙敏係個會考失敗的學生妹, 到如今出道當佢有十幾年, 應該最多係三十鬆 D, 但陳浩民就係蘇永康個同屆同學, 祗係樣貌襟睇, 年齡起碼有三十五六, 真係何來姊弟戀? 而家真係太多 新入行的娛記, 連人地個底都起唔清就亂報導, 講真就算係姊弟戀, 青蛙仔真係唔知有幾多人會對佢兩個有 興趣來追看呢? 嘿嘿!

15.04.2002 (Mon) 晴
睇報紙見到內地的中國民航最近首次招考空中少爺,嚴謹程度似招考演藝人一樣,體形、外貌、氣質都要出眾,而且中英文發音又要標準正確,仲要裸露部份身體以確保無紋身及疤痕,再加上才藝表演,過幾關先可 以被取錄,可能係首度招考,因此吸引幾百人投考,青蛙仔在圖片所見,有好標青的男孩子, 亦有樣貌平平 似阿丙的都應徵, 其實都係想碰下運氣, 以前六七十年代成日都聽見"人浮於事"呢幾個字, 因為以前經濟唔 好, 好難搵到野做, 到左八九十年代已經漸漸少聽, 到左而家, 又再一次聽到呢句野, 呢一代的年青人真係 好刻苦, 讀完十幾年書就係出來等機會, 分分鐘要做低下層的工作, 好無奈!!

17.04.2002 (Wed) 晴
【醫神】在台灣表演受傷,香港娛樂記者又再疲於奔命,頭條多數用下體重創來吸引讀者,並將此意外推在其唱片公司身上,公司風水唔好,旗下歌星人人自危,唔知幾時輪到自己,不過呢單意外係尷尬野,青蛙仔 公司的後生女同事都唔會好似早幾日阿四個仔單新聞咁拿出來評論,但青蛙仔都想講下,班記者的幻想力幾 豐富,明明連【醫神】個人影都唔見,祗係見到護士拎住條褲就可以寫到佢放完血之後,袋袋仍然不斷流 血,甚至整濕幾條褲,真係幾鬼血腥兼好笑,明明都話縫左三針啦,就算滲血都唔會咁誇張掛,點解唔介紹 佢用純白活性炭超級防滲夜用安全雙飛護翼,等佢訓得安心D呢!

25.04.2002 (Thu) 晴,大風
今朝同事的話題就梗係講葉太俾人包圍的新聞,其實青蛙仔尋晚日記都有提過下,今日想講下葉太幾有大將之風,雖然被困,但仍然係氣定神閒,祗要佢唔落車,班友真係奈佢唔何,等人來救的期間睇下時代雜誌, 不知幾爽,有人問點解會等成粒鐘先有救兵,其實時間都差唔多了,佢地要諗下調派幾多人來先可以控制場 面,分分鐘要綵排下先來,況且在場有咁多記者影住,證明官員係對個班人有極大的容忍,經此一役,呢班 友仔的討厭程度又再升級,真係佛都有火,睇怕好快就會想辦法請佢地返上去,到時就一天都光曬。

12.04.2002 No.125

21.03.2002 (Thu) 晴,春分
固力果在今日報紙登全版啟事,數十款產品祗有四款係含有個種所謂有害的代糖(甜菊糖X個X字連電腦都打唔到),青蛙仔細個時都幾鍾意食百力滋同甘大滋,不過近幾年都好少買呢類零食了,睇下段啟事,原來百力滋都有十幾廿款,證明人的口味轉得快,先會有咁多款味道出現,又例如日清的麵品,款式又係多到無倫,不過青蛙仔好保守、傳統同長情,喜歡的食物多數都係傳統classic的出品,轉新口味的產品多數都吸引唔到青蛙仔,大家又會唔會貪新厭舊呢?

22.03.2002 (Fri) 十分和暖,濕, 雨
青蛙仔每朝返工都會經過一間紙紮舖,所售賣的紙製物品真係樣樣皆備,服裝、傢俬、家庭用品甚至VCD機都有,幾可亂真,最近見到間舖有樣新貨,青蛙仔幾次經過都覺得塊有轆的滑板係真的,仲諗紙紮舖點解會無 端端賣滑板,後來再睇真D,原來係用瓦通紙造的,真係笑出來,但隨即又有點黯然,因為呢樣野唔會係為成 人而造,有需要買的都會係家中有小孩去世,忽然覺得有點唔安樂!

真係唔睇報紙都唔知,原來舊的X光片咁有價值,尋日政府物料供應處舉行拍買會,其中有五萬幾公斤連套 賣的舊X光片,竟然以五十萬成交賣出,原來每一百磅的X光片係可以提煉到一斤白銀,一斤白銀值三百幾, 即係話五萬幾公斤全數提煉出來的話,該批白銀可值七百萬,用五十萬搏七百萬呢門生意又做得過,青蛙仔 唔係讀理科,真係唔講就點都唔會知呢種底片竟然有寶,大家又知唔知呢?

23.03.2002 (Sat) 早上黃雨及雷暴警告
娛樂版報導記者追訪【黑人】直踩CD工場督工,對唱片公司高層口黑面黑云云,事緣係話【黑人】的現場演會CD一出就賣斷市(佢話,不過青蛙仔仲見有),於是黑人好緊張要唱片公司再出貨,但高層又懶懶閒唔理, 於是黑人就好火爆,走去工場幫手包裝,又俾記者影張海報話整得唔靚,於是高層就回應記者話呢張CD係落 重本之作,又用左乜乜物物來混音,所以慢工出細貨,簡直做足大龍鳳,不過青蛙仔真係唔欣賞呢種宣傳手 法,其實咁講都係想個班驚執輸的人快手D清左第一批貨,等佢地安心再出第二批,講真青蛙仔所見,除左雙 生兒真係試過賣斷市之外,都好少見其他CD係買唔到的,如果照黑人講已經賣左三萬隻,都算唔錯了,再出 多六萬真係太貪心,另一方面如果真係為樂迷著想的話,唔該佢唔好開完演唱會唔夠個幾月就出現場CD啦, 遲D仲話出埋VCD,你估對俾幾百蚊睇演唱會的人公平咩?最後個高層都踢爆左最重要一點,佢話如果真係賣 得,點會有錢唔賺拖住佢呢?無錯,有咁笨咩!

25.03.2002 (Mon) 上午陰雨,大霧, 下午轉晴
真係好服班傳媒,可以諗到一個咁貼切的名來形容財神爺同跳水皇后的戀情,真係繼【王鋒戀】、【東芝 戀】及【奪麵雙琪】之後又一佳作,【伏松戀】的諭意係邊個服從邊個呢?傳媒的馬後炮神功真係出神入 化,即時爭相訪問有關人等,幾乎誅連九族,有殺錯無放過,人人有份受訪講感受,連網友都唔執輸,連聲 反對,絕無好評,【阿伯】、【阿爺】及【一朵鮮花插在唔知咩上】的好句,源源不絕地向佢地【祝賀】, 真係幾攪笑,更攪笑係而家財爺同跳水皇后出席任何地方都一定有大班人等住,祗係一個笑容都會被形容為 【春風滿面】或者係【人逢喜事精神爽】,相個短期內佢地想見面都難,狗仔隊的鏡頭分分鐘經已對準佢地 間房,隨時準備捉姦在床,想有婚前性行為更係難過登天了。

27.03.2002 (Wed) 晴, 出糧日
兩位猴年出生的人氣偶像近來似乎都有點麻煩, 一個涉嫌撞車唔認數搵替死鬼, 另一個又涉嫌被人寄毒陷害, 同公司的一位浪子前輩接受記者訪問時即時劃清界線, 好一句從來都無同門師弟, 同佢地唔係好熟, 慌死惹禍上身, 一來唔使妨礙司法公正, 二來又可以出番一口冤屈氣, 因為入左間公司咁耐, 位又唔夠人爭, 碟又 唔夠人賣得好, 做前輩的顏面又係好難放得低的!

31.03.2002 (Sun) 陰雨, 耶穌在死後的第三日復活過來!
剛剛睇勁歌季選, 真係無針對楊小姐, 同佢同名的個首歌到底有咩好? 真係樂壇淪埳! 雙生兒都係 時候休息一下了, 唱歌完全力不從心, 面上光采消失了, 再係咁落去, 真不敢想像! 新人周英杰到底有幾好? 因為整棚牙整到黐曬利筋, 太影響唱歌了, 值得一讚係夠勇氣唱live! 容祖兒暴肥師奶的裝扮, 真係破壞首 歌, 好痛心! 唱地鐵歌的兩位普通女孩, 咁好樹會都唔唱live, 第日點出大場面? 霆鋒已經唔係第一次咁任 性而失準, 每次都扮曬傳媒的犧牲品出來, 點解唔可以好好面對, 大前題係先唱好歌都唔知, 仲可以做咩 野?

04.04.2002 (Thu) 晴,兒童節
【鋒菲戀】的男主角因為分手而大受困擾,一副受害者的面孔出現,又話喊又話自殘,又令追訪的記者疲於奔命,有多事之徒竟然當事人唔問,偏偏而挑撥離間,走去問【浪子歌手】,本來人地都答得好得體,佢話 喊唔係問題,因為連牛同埋象都會喊,何況係人?但傳媒偏要寫成【連畜牲都會喊啦!】,簡直係惡意傳 達,相信大家都知道人地話你似隻牛同埋話你似畜牲個分別,真係佩服傳媒火上加油的本事!

29.03.2002 No.124

06.03.2002 (Wed) 天氣轉冷,晴,是日驚蟄
在巴士上睇到楊小姐的一首MTV,真係不吐不快,而家唱片業競爭咁大,估唔到仲會有咁差的歌出現,其實佢唱得算係好努力,可惜歌曲祗係一般band sound行貨,歌詞更加係胡言亂語、東湊西夾來就旋律,青蛙仔讀 得書少,雖然每一個字都識讀,但就真係唔知首歌想講咩野,後來諗諗下又覺得首歌好貼題,因為時下好多 後生都同首歌一樣係咁不知所謂,真係用心良苦,其實個MTV都有可取之處,因為個男主角貌似陳冠希,都幾 型仔,可以吸引唔少學生妹去睇,講左咁耐都無講首歌名,好似叫【咩咩青年】掛!

07.03.2002 (Thu) 晴
雖然財政預算案霸佔全港報紙頭條,但追訪【地產神童】的新聞仍然企硬娛樂版,連成龍大哥丁母憂都唔夠佢來,認真無得頂,青蛙仔午飯時都聽到阿sir同同事們研究,到底娛樂圈邊個做雞,大家左猜右算,似乎無 個係乾淨,所有新舊天后無一倖免,真係俾佢地笑死!

10.03.2002 (Sun) 晴
新聞版報導有一個二百磅的十四歲女童,因為不受家人諒解及受到其他人岐視而吞老鼠藥自殺,報導講佢食量驚人,一個人可以食清四人電飯煲的飯,每日廿蚊零用錢都唔夠食,所以有時會偷家人的錢去買野食, 在 校又無朋友, 每日就係食野、訓覺同睇電視, 真係一個悲劇, 其實肥唔係罪過, 但如果不事生產, 淨係掛住 食的話, 就連屋企人都討厭佢, 都幾可悲, 但另一方面, 佢父母都有責任掛, 自細就由得佢暴飲暴食, 肥到 不可收拾之時就放棄佢, 不如唔好生啦, 好乞人憎!

11.03.2002 (Mon) 晴朗
今日方向報的頭條係十六歲女生大肚上學,校方好大方容許佢繼續返學,佢家人反而投訴學校,而家D人真係無理取鬧,學校採取容忍態度又唔滿意,相信如果學校逼佢退學又可能投訴話無人權了,點解唔管下個女, 成日容許個男朋友去女方家過夜,發生事就亂叉咁投訴,唔知大家最近有無睇過陳果拍的宣傳片,青蛙仔好 同意佢著重向女仔勸告,因為勸服佢同人上床發生關係的就係佢自己,女仔把持唔住的話,蝕底永遠係自 己!

14.03.2002 (Thu) 陰
【男人四十】真係張學友的代表作,演得非常用心,因為實在好適合佢做,由頭擔到尾帶住幾個新人做戲,林嘉欣面孔清新,情挑老師絕不造作,不過青蛙仔略嫌佢身材稍為baby fat,如果高瘦一點會更好睇,而梅 艷芳雖然一貫的投入與落力,奈何焦點唔係放在佢身上,所以就未見突出,整體來講真係幾好睇,岸西的編 劇好生活化,其餘選角都非常稱職,攝影與配樂都好好,許鞍華電影又一佳作!

17.03.2002 (Sun) 陰雨
娛樂版報導肥姐割完膽石出院, 接受記者訪問時回答, 呢幾日都食得好清淡, 祗係鮑魚, 雞湯同燕窩粥, 哈, 呢幾味對有錢人來講都祗係清淡野, 青蛙仔都好恨食燕窩粥呢, 不過青蛙仔又唔覺肥姐好寸, 因為以佢來講, 身家一定豐厚, 而且佢又好鍾意食野, 日日食燕窩都唔係咩一回事, 況且係食落肚, 又唔係倒左佢, 俾著青蛙仔有錢都一樣會日日食燕窩做早餐, 因為青蛙仔的早餐一向都係鮮奶, 加埋燕窩就更好啦, 相信連續食28 日燕窩的功效, 一定好過某名模出嫁之前連續敷28日祕密鎖匙II面膜, 其實價錢都差唔多的!

19.03.2002 (Tue) 晴
有雜誌報導傳聞有富豪想用八千萬包起【雙生兒】來【起雙飛】,青蛙仔睇到都覺得誇張又好笑,原來佢地的身價真係高得咁緊要,計落一人四千萬,想當年傳聞【粗口美人】獲選香江小姐之後,富豪想同佢做朋友 用一個樓盤單位來做禮物,礙於佢一早同名作家之子非常要好,所以婉拒了富商好意,於是富商繼續再送, 一個單位唔夠就送兩個,兩個唔夠送三個,一直送到十個,終於用【誠意】來打動美人芳心,即時同作家之 子say goodbye,價值都好似係千多萬,如今【雙生兒】個價都算驚人,但青蛙仔好好奇,到底係點樣斟盤, 向經理人埋手定直接約佢兩個傾呢?經理人使唔使抽佣呢?同時約兩個出來,佢地會唔會你眼望我眼,睇下 對方制唔制、即時婉拒(唔敢咁硬,因為驚富商有勢力)、定係話返去考慮呢?仲有,佢兩個返到去會唔會互 相猜忌,有無諗過獨食呢?邊個敢先講話接受呢?因為一旦講先,但對方又話唔做,咁就慘了,會唔會睇唔 起對方呢?確實係一個極大考驗!

15.03.2002 No.123

19.02.2002 (Tue) 晴
呢兩日因為生病而睇多左電視, 尋晚認真睇左一次"智在必得", 其實之前有睇, 都想提出一樣野來傾下, 就係個獎金獎品的環節, 真係可以睇到人生百態, 尤其係講價的觀眾, 個貪錢樣真係完全表露無遺, 青蛙仔都 貪錢, 但要好似佢地咁真係做唔出, 同埋睇得出佢地一場來到, 一定係想要多d現金, 俾著青蛙仔都會係咁, 話就話好多獎品好名貴, 但青蛙仔覺得幾萬蚊的床上用品, 或者十幾萬的健身會籍, 都唔會及得上一萬蚊現 金, 除非咁橋真係有部車, 算係值下錢, 否則幾大都叫佢俾多d, 一於要獎金!

22.02.2002 (Fri) 好好天
又一間【樂園】執笠,又有唔少苦主手持遊戲券望門興嘆,青蛙仔真係好唔明個班師奶同婆婆,玩得仲沉迷過班細路,一次玩幾百蚊都面不改容,換來的禮物用現錢買都唔使咁貴,最受歡迎的推錢機亦毫無好玩可 言,祗係不停入代幣,睇住佢郁郁下等出飛,班師奶就可以坐成日,真係【人各有志】,不過近幾年來有唔 少商號執笠,顧客手持的套票即時變成廢紙,但仍然有大把人貪便宜信間舖頭而購入套票,風險同後果就要 自負了, 不過青蛙仔都手持十張八張餅券在手, 八折購入之後用來換生日餅就平D。

26.02.2002 (Tue) 晴,元宵佳節
電影公司為左刺激【天下無雙】的票房,專登在昨日包了利舞台戲院的三場,請全港觀眾入場睇,以傳口 卑,睇報紙見到反應踴躍,戲院門口排了長龍,似乎都係一批唔願意俾錢,但又想睇戲的人,佢地會唔會幫 電影傳口卑就不得而知,但青蛙仔幾欣賞呢種宣傳手法,原來祗係用左七八萬就已經攪掂,可以見報又可以 用來幫公司支出報稅,都算唔錯了,賀歲片來講,青蛙仔就祗係睇左【天下無雙】覺得真係幾好,估唔到竟 然係幾部港產片之中票房最差的,總係覺得有點可惜!

28.02.2002 (Thu) 晴
最近某周刊訪問了曾經燒炭自殺而執番條命的【前富商】,大爆娛樂圈的醜聞,形容眾女星的身材刻薄得來又抵死,都唔知真定假,其實早年該富商風光之時又後生又有錢,個樣亦唔差,有女星黐埋去搵食真係唔 奇,反正都係搵錢,唔通跟個老坑咩,不過一沉百踩,同佢有過一手賺過佢錢的都人人自危,出來劃清界 線,現實真係殘酷,該雜誌的集團仲驚死無人知,在報紙中的港聞頭版及娛樂版都有報導,肯定係為左谷銷 量先會咁,一眾八卦之徒好似青蛙仔咁就睇得開心,幾好丫!

02.03.2002 (Sat) 晴
今朝有個女人帶住三個仔女來辦手續,一級級,最大都係十歲八歲,但睇得出係智障的,青蛙仔望一望第二個都係咁樣,到最細一個先似係正常人,真係好佩服呢位女士,生完一個係智障的都仲要再生,第二個都係 咁樣都仲唔驚,仲要再生第三個,其實有無諗過咁樣唔係偉大,簡直係自私,真係好難想像一個普通家庭會 有兩個智障的小朋友會係點,呢個情形又令青蛙仔想到前世今生、討債還債的事,如果唔係上幾世做過某種 事,今世點解會咁?有咩理念咁堅定可以令佢生完又生呢?抑或上天要俾試練個女人?今次青蛙仔唔幫男 人,因為呢種含辛茹苦的過案總係唔覺有男人份,多數都係阿媽湊大佢地的,大家有無同感?

05.03.2002 (Tue) 晴
【地產神童】的新聞一日接一日,瘋狂程度簡直蓋過了當年的娛樂圈【白馬王子】,記者明知佢濫用藥物,講野無句真,仍然遠赴法國追訪,破壞了【電波少女】賺錢購物的大計,好夢乍醒,逼住匆匆持空皮箱回港 澄清,並劃清界線,估唔到有人明知人地會趙完唱,仍然會冒險接受【頭等機票】的邀請,青蛙仔最多都係 搭過商務客位,真係唔知道坐頭等有幾享受,不過如果真係照電波少女所講的點頭之交,但又接受人地頭等 機票咁厚禮,似乎又無咁大隻蛤(也母)隨街跳,呢種現象就係娛樂圈好玩之處,無呢D人就無呢D記者,亦唔 會有青蛙仔呢種八卦讀者,相輔相成!

01.03.2002 No.122

10.02.2002 (Sun) 陰,年廿九
下午坐巴士出銅鑼灣時經過一間銀行,見到萬國寶通竟然轉了名做【花旗銀行】,如果唔係英文名無變,真係以為有間新銀行出現,不過【花旗】呢兩個字都幾攪野,雖然係代表美國,但會令青蛙仔想起【花旗參】 同埋發哥一套舊片【花旗少林】,到底一間銀行點解會改名呢?係俾人收購定係有其他原因呢?點解淨係改 中文名而唔改英文名呢?因為Citibank深入民心定係萬國寶通難記呢?

11.02.2002 (Mon) 陰,賣懶賣到年卅晚
最近公司掀起申請信用咭熱潮,原因係有同事的朋友在信用咭公司做,需要交quota,因此就以遞表就有贈品來吸引,而同事又覺得份座檯文具幾吸引,加上成功申請之後簽滿幾多又有另一份禮物,於是師奶們就紛紛 申請,不過青蛙仔真係提唔起興趣,現有兩張信用咭已經好夠用,就算點樣免年費同埋送禮物都唔會再申請,青蛙仔都幾服個種一打開銀包就六七張信用咭的人,到底係用來透支定係有咁大需要呢?

13.02.2002 (Wed) 年初二開年
睇報紙知道年卅晚年宵之後, 香港各區的年宵市場製造了二百幾噸垃圾, 維園就佔最大, 有成百幾噸, 香港人製造垃圾真係驚人, 唔係講笑, 好快香港就會真真正正變成臭港了!

14.02.2002 (Thu) 初三赤口情人節,晴天
【天下無雙】真係套唔錯的選擇,幾乎係由頭笑到尾,梁朝偉同王菲有種豁出去的感覺,做喜劇完全難唔到佢地,資深導演劉鎮偉拍喜劇仍然追得上時代,記起八九年前的賀歲片【東成西就】就係佢做導演,當時梁 朝偉的【孖潤腸】幾乎笑到青蛙仔跌落地,今次【天下無雙】雖然未及當年咁大堆頭,(當年的cast真係一時 無兩,粒粒巨星,連最當紅的葉玉卿都係做配角,做奸妃打個毒鼓亦令人印象難忘!),但今時今日來講都算 好好了,過新年開開心心個幾鐘,拋開煩惱人人都想啦!

15.02.2002 (Fri) 年初四開工了,晴
睇報紙知道新年假期內有大量內地而來的遊客湧到海洋公園,令到公園熱鬧擠逼,度度排大隊,攪到有部份香港人不滿意要投訴云云,青蛙仔覺得真係無可厚非,其實而家海洋公園的主要收入都係靠內地遊客,好心D 香港人咪咁小器啦,鬼叫你在呢D時日同人爭咩,青蛙仔覺得既然係香港人,可以搵平日得閒先去囉,人地要 申請先來得到,當然分秒必爭啦,所以都無得怨的,其實香港人去到外國的主題公園都一樣係咁乞人憎,青 蛙仔親身經歷都覺得唔抵幫香港人,去到人地地方都係唔守規矩,都唔知點樣同埋幾時先可以教育到下一代 可以好似富強國家咁有禮貌與自律呢?

16.02.2002 (Sat) 好好天
雖然青蛙仔唔算係【黑人】的歌迷,但佢在演唱會的狀態大勇,歌藝有九十分以上,真係幾出色,而且大部份都係舊歌,特別易接受,不過青蛙仔稍唔滿意主辦機構為左攪氣氛就在入場時每人派兩個長膠袋,俾觀眾吹漲來拍出聲音,係就係幾好氣氛,但幾場就製造了近十萬個塑膠廢物,都幾恐佈,希望呢種質料係容易分解的啦!另外其實青蛙仔唔係咁喜歡黑人帶挈佢老友【梁檸檬】上台講野,仲分兩次每次都兩三個字,講的都離唔開屎尿屁,青蛙仔真係唔覺得好笑,祗係覺得好浪費時間,相信黑人用呢D時間來唱多五六首歌絕對無問題,但為左俾老友出鏡,佢都算用心良苦,呢種朋友又真係識得過,青蛙仔俾個叻佢!

17.02.2002 (Sun) 好好天
娛樂版報導楊千嬅小姐的宣傳海報因為涉嫌抄襲警隊而被禁用,呢個point就係最佳宣傳項目,於是記者就訪問當事人,而楊小姐就表現無知的話從來都無見過原裝張海報,青蛙仔記憶所及楊小姐唔係第一次咁無知, 早前曾經話過唔知【安安】同【佳佳】係乜野而令青蛙仔對佢刮目相看,之後佢出左首【少女的祈禱】先對 佢有所改觀,但而家又一次令青蛙仔失望,佢仲會唔會咁好彩執到隻好歌呀?人生又有幾多次好機會呢?

18.02.2002 (Mon) 好好天,初七人日
娛樂版報導鄭伊健的人日願望係日日有【四方果】食,【四方果】係行內術語,意思係飯盒,呢種願望對好多人來講當然係唔鍾意啦,人人都想食山珍海錯,邊個想日日食飯盒丫,但日日有飯盒食就即係日日有工 開,對藝人來講就最好不過的事,所以每人都有自己的想法,自己認為好的,未必可以加諸在其他人身上, 【汝之蜜糖,彼之砒霜】,你當係寶,人地當係草,你當係草的,人地又會當係寶,尤其是係男女朋友,所 謂【情人眼裡出西施】,眾人都覺得平平無奇的、唔知有咩好的人,卻係最暸解自己,最令自己舒服的人, 你真係吹佢唔漲!


舊青蛙雙週記